काठमाडौं । राष्ट्रिय विपद् जोखिम न्यूनीकरण तथा व्यवस्थापन प्राधिकरणले उद्धारको पर्खाइमा रहेका व्यक्तिहरूलाई आफू रहेको स्थानबाट उद्धार टोलीको ध्यानाकर्षण गराउन आगो बालेर धुवाँको सङ्केत गर्न आग्रह गरेको छ ।
रसुवाको भोटेकोशीमा आएको बाढीका कारण रसुवा, नुवाकोट, धादिङ, चितवनलगायतका जिल्ला प्रभावित भएपछि खोज तथा उद्धार कार्यलाई तीव्रता दिइएको प्राधिकरणले जनाएको छ ।
बाढी प्रभावित क्षेत्रमा खोज तथा उद्धारका लागि हेलिकप्टर तथा ड्रोन प्रयोग गर्नुपर्ने भएकाले सम्बन्धित संघसंस्थालाई सम्बन्धित जिल्ला प्रशासन कार्यालय, सुरक्षा निकाय र स्थानीय तहसँग समन्वय गरेर सहयोग गर्न प्राधिकरणले अनुरोध गरेको छ ।
प्राधिकरणले वायुसेवा सञ्चालक संघ नेपाल, नेपाल ड्रोन संघलगायत हेलिकप्टर तथा ड्रोनसँग सम्बन्धित सबै संघसंस्थालाई उद्धार अभियानमा सहकार्य गर्न विशेष आग्रह गरेको हो ।
त्यस्तै, बाढी प्रभावित क्षेत्रका नागरिकलाई सुरक्षित स्थानतर्फ जान, सम्भावित जोखिमबाट सतर्क रहन र उद्धार टोलीसँग आवश्यक समन्वय गर्न प्राधिकरणले आग्रह गरेको छ ।
प्राधिकरणका उपसचिव एवं प्रवक्ता शान्ति महतले बाढी प्रभावित विभिन्न जिल्लामा खोज तथा उद्धार कार्य निरन्तर भइरहेको जानकारी दिइन्।
