जनकपुरधाम । जनकपुरधामका पोखरी तथा गुठी जग्गा अतिक्रमण गरी निर्माण गरिएका संरचना हटाउन गुठी संस्थानले डोजर परिचालन गरेको छ। संस्थानले आजदेखि अतिक्रमित संरचना हटाएर जग्गा खाली गराउने अभियान सुरु गरेको हो।
गुठी संस्थान जनकपुरधामका प्रमुख किशोरकुमार झाका अनुसार जनकपुरधाम–४ स्थित पेठीया बजारनजिकको गोरधोइ पोखरीबाट अतिक्रमित संरचना हटाउन थालिएको हो। संस्थानले पटक–पटक सूचना जारी गर्दै सम्बन्धित व्यक्तिलाई आफैँ संरचना हटाउन आग्रह गरे पनि अटेर गरेपछि स्थानीय प्रशासन तथा सुरक्षा निकायको समन्वयमा डोजर चलाइएको उनले बताए।
संस्थानले जनकपुरधामका सातवटा पोखरीमा भएको अतिक्रमणको लगत सङ्कलन गरी जग्गा खाली गराउने प्रक्रिया अघि बढाएको छ। लगत सङ्कलनका क्रममा केही स्थानमा ठूलो क्षेत्रफल र केही ठाउँमा सामान्य रूपमा अतिक्रमण भएको पाइएको प्रमुख झाले जानकारी दिए।
उनका अनुसार जनकपुरधाममा गुठी संस्थानअन्तर्गत ४९ वटा पोखरी रहेका छन्। पोखरी, मठमन्दिर तथा अन्य गुठी सम्पत्तिको अतिक्रमण हटाउन गुठी संस्थानका प्रशासक ध्रुव घिमिरेको संयोजकत्वमा गठित नौ सदस्यीय समितिले काम गरिरहेको छ।
समितिले सङ्कलन गरेको विवरणका आधारमा प्रतिवेदन तयार गरी संस्थानको केन्द्रीय कार्यालयमा बुझाइसकेको छ। प्रमुख झाका अनुसार जनकपुरधाममा गुठी संस्थानको करिब २२ देखि २५ बिघा जग्गा अतिक्रमणमा परेको अनुमान गरिएको छ।
रत्नसागर क्षेत्रमा मात्रै करिब नौ बिघा तथा बेलाकुट्टी क्षेत्रमा चार बिघाभन्दा बढी गुठी जग्गा अतिक्रमण भएको संस्थानको अनुमान छ। अतिक्रमित जग्गा पहिचान गरी चरणबद्ध रूपमा खाली गराउने प्रक्रिया अघि बढाइएको संस्थानले जनाएको छ।
