काठमाडौं। राष्ट्रिय खेलकुद परिषद् (राखेप) ले १०औँ राष्ट्रिय खेलकुद प्रतियोगिता आगामी मंसिर १६ देखि २९ गतेसम्म सुर्खेतमा आयोजना गर्ने निर्णय गरेको छ।
बिहीबार सिंहदरबारमा बसेको राखेपको १२५औँ बोर्ड बैठकले प्रतियोगिताको मिति तय गर्दै आवश्यक मापदण्ड तथा निर्देशिका पारित गरेको राखेपका सदस्यसचिव रामचरित्र मेहताले बताए। बैठकमा युवा तथा खेलकुदमन्त्री, सातै प्रदेशका सदस्यसचिव तथा परिषद्का सदस्यहरूको उपस्थिति थियो।
बैठकले जापानमा आयोजना हुने १९औँ एसियाली खेलकुदमा खेलाडी र अफिसियल गरी २१८ जनाको सहभागितालाई अन्तिम सहमति दिएको छ।
त्यस्तै, नेपालमा पहिलोपटक पारा राष्ट्रिय खेलकुद प्रतियोगिता आयोजना गर्ने निर्णय भएको छ। प्रतियोगिता आगामी पुस १५ गतेदेखि सुरु हुने मेहताले बताए।
बोर्ड बैठकले कर्मचारी व्यवस्थापन, आन्तरिक स्रोतको विनियोजन तथा चालु आर्थिक वर्षको बजेट प्रमाणीकरणलगायत प्रशासनिक विषयमा पनि निर्णय गरेको छ।
बैठकमा अखिल नेपाल फुटबल संघ (एन्फा) मा देखिएको विवाद र निलम्बनका विषयमा समेत छलफल भएको थियो। परिषद्ले विवादको वस्तुस्थिति बुझेर निकासका लागि समन्वय र सहकार्य भइरहेको जनाएको छ।
