काठमाडौं – युरोपेली फुटबल महासंघ (यूइएफए), उत्तर तथा मध्य अमेरिकी तथा क्यारिबियन फुटबल महासंघ (कन्काकाफ) र एसियाली फुटबल महासंघ (एएफसी) सहित विभिन्न फुटबल निकायले फिफा अध्यक्ष जियानी इन्फान्टिनोमाथि ‘छल गरेर विश्वास तोडेको’ आरोप लगाएका छन्।
फुटबल निकायका अध्यक्ष तथा महासचिवहरूले संयुक्त रूपमा हस्ताक्षर गरेको खुला पत्रमा फिफा फर्वार्ड इन्टरप्राइजेज (एफई) सम्बन्धी पछिल्लो विवाद केवल एउटा व्यावसायिक परियोजनासँग मात्र सम्बन्धित नभएको उल्लेख गरिएको छ। उनीहरूले यस विषयलाई विश्व फुटबलको अखण्डता तथा त्यसको नेतृत्व गर्न निर्वाचित व्यक्तिहरूको विश्वसनीयतासँग जोडेर हेर्नुपर्ने बताएका छन्।
फिफा फर्वार्ड इन्टरप्राइजेजअन्तर्गत विश्वकपसहित फिफाका विभिन्न प्रतियोगिताको व्यावसायिक तथा टिकट अधिकार व्यवस्थापन गर्न नयाँ कम्पनी स्थापना गर्ने प्रस्ताव अघि सारिएको थियो। प्रस्तावित कम्पनीमा २१ प्रतिशत हिस्सा निजी लगानीकर्तालाई दिने योजना थियो।
तर उक्त प्रस्ताव सार्वजनिक भएपछि फिफाभित्रै तथा विभिन्न महादेशीय फुटबल महासंघबाट व्यापक विरोध भएको थियो। विरोध चर्किएपछि फिफाले उक्त योजना अघि नबढाउने निर्णय गरेको थियो। केही कन्फेडेरेसनले प्रस्ताव कार्यान्वयन भए फिफाका प्रतियोगिता बहिष्कार गर्नेसम्मको चेतावनी दिएका थिए।
यसअघि शनिबार साँझ जारी विज्ञप्तिमा फिफाले संस्था र अध्यक्ष इन्फान्टिनोलाई ‘कमजोर’ बनाउने उद्देश्यले समन्वयात्मक र निरन्तर प्रयास भइरहेको भन्दै त्यसको कडा आलोचना गरेको थियो।
फिफाले फिफा फर्वार्ड इन्टरप्राइजेजसम्बन्धी विवादबारे आगामी अक्टोबरमा फिफा काउन्सिलसमक्ष प्रतिवेदन पेस गर्ने प्रतिबद्धता जनाएको छ। तर खुला पत्रमार्फत महादेशीय फुटबल निकायहरूले फिफाभित्रैबाट हुने समीक्षा पर्याप्त नहुने भन्दै पूर्ण रूपमा स्वतन्त्र तेस्रो पक्षबाट छानबिन गर्न माग गरेका छन्।
फिफा नेतृत्व र प्रमुख महादेशीय फुटबल निकायबीच बढेको यो विवादले विश्व फुटबलको प्रशासनिक संरचना, पारदर्शिता र नेतृत्वको जवाफदेहितामाथि गम्भीर प्रश्न उठाएको छ। अब फिफाले प्रस्तावसँग जोडिएको विवाद र अध्यक्ष इन्फान्टिनोमाथि उठेका प्रश्नलाई कसरी सम्बोधन गर्छ भन्ने विषयले विश्व फुटबलको आगामी प्रशासनिक तथा राजनीतिक दिशामा समेत प्रभाव पार्ने देखिन्छ।
