काठमाडौं । नेपाली राष्ट्रिय क्रिकेट टोलीका कप्तान रोहितकुमार पौडेलले नेदरल्याण्ड्स भ्रमणको निराशाजनक नतिजापछि ओमानमा हुने आईसीसी विश्वकप लिग–२ को अन्तिम श्रृङ्खलाबाट एकदिवसीय मान्यता जोगाउने विश्वास व्यक्त गरेका छन्। लगातार चार हारपछि समर्थकभन्दा टोली नै बढी निराश रहेको उनको भनाइ छ।
शुक्रवार स्वदेश फर्किने क्रममा त्रिभुवन अन्तर्राष्ट्रिय विमानस्थलमा रोहितले अपेक्षाअनुसार प्रदर्शन गर्न नसक्दा नतिजा आफ्नो पक्षमा पार्न नसकिएको स्वीकार्दै अब टोलीको सम्पूर्ण ध्यान ओमान श्रृङ्खलामा केन्द्रित हुने बताए।
नेदरल्याण्ड्स र नामिबिया सम्मिलित लिग–२ श्रृङ्खलाका चारै खेलमा पराजित भएपछि नेपालको शीर्ष चारमा रहने सम्भावना कमजोर बनेको छ। त्यससँगै एकदिवसीय मान्यता जोगाउने दबाब पनि बढेको छ।
रोहितका अनुसार हारको प्रमुख कारण ब्याटिङ र फिल्डिङ दुवैमा अपेक्षाअनुसार प्रदर्शन हुन नसक्नु रह्यो। नेपाली ब्याटरले त्यहाँको पिच र कन्डिसनअनुसार खेल्न सकेनन् भने नेदरल्याण्ड्सले छोटो लम्बाइका बलमा बनाएको योजनाविरुद्ध पनि चुक्दा त्यसको असर नतिजामा देखियो। फिल्डिङमा पनि टोली आफ्नो स्तरमा प्रस्तुत हुन नसकेको र एउटा खेलमा छुटाइएको क्याच नै निर्णायक बनेको उनले उल्लेख गरे।
पहिलो खेलमा दीपेन्द्रसिंह ऐरीसँग बनेको साझेदारीलाई ठूलो स्कोरमा रूपान्तरण गर्न नसकिएको तथा अन्तिम खेलमा सन्दीप लामिछानेलाई बाहिर राख्ने निर्णय टोलीको रणनीतिअनुसार गरिएको उनले बताए।
टोली साना–साना क्षणमा चुकेको उल्लेख गर्दै रोहितले युरोपेली कन्डिसनमा खेल्न बलिया टोलीलाई पनि चुनौती हुने बताए। उनले ओमानमा हुने अन्तिम श्रृङ्खलामा कमजोरी सुधार्दै नतिजा आफ्नो पक्षमा पार्ने लक्ष्य रहेको बताए।
