काठमाडौं । नेपालका पाँच बाल खेलाडी जापानमा आयोजना हुने ३२औं विश्व चिल्ड्रेन्स बेसबल फेयरमा सहभागी हुने भएका छन्। १० देखि १२ वर्ष उमेर समूहका दुई छात्रा र तीन छात्रसहित प्रशिक्षकसहितको ६ सदस्यीय नेपाली टोली बुधबार जापानको नारिता प्रस्थान गर्नेछ।
जुलाइ ३० देखि अगस्ट ७ सम्म नारितामा हुने फेयरमा नेपालका तर्फबाट अभिनय श्रेष्ठ, संकल्प पौडेल र युएल रोक्का (ब्वाइज) तथा भूमिका खड्का र खुशी श्रेष्ठ (गल्र्स) ले सहभागिता जनाउनेछन्। टोलीको प्रशिक्षक विपिन वज्राचार्य छन्।
राष्ट्रिय खेलकुद परिषद् (राखेप) का सदस्यसचिव रामचरित्र मेहता र युवा तथा खेलकुद मन्त्रालयका सल्लाहकार राजु सिंहले सोमबार आयोजित कार्यक्रममा टोलीलाई सफलताको शुभकामना दिँदै बिदाइ गरे।
नेपाली टोलीले वल्र्ड चिल्ड्रेन्स बेसबल फाउन्डेसनको पूर्ण छात्रवृत्तिमा फेयरमा सहभागिता जनाउन लागेको हो। नेपालले यो अवसरका लागि पछिल्लो ६–७ वर्षदेखि निरन्तर प्रयास गर्दै आएको थियो।
फेयरमा नेपालसहित अस्ट्रेलिया, अमेरिका, क्यानडा, केन्या, जर्मनी, जापान, चाइनिज ताइपेइ, फिलिपिन्स, मलेसिया, सिंगापुर, भियतनामलगायत १४ राष्ट्रका बाल खेलाडी सहभागी हुनेछन्।
फेयरका क्रममा नेपाली खेलाडीले बेसबल क्लिनिकमा प्रशिक्षण लिनुका साथै जापानको निप्पोन प्रोफेसनल बेसबल (एनपिबी) प्रतियोगिताको अवलोकन गर्ने अवसर पाउनेछन्। विभिन्न देशका खेलाडीसँग मिश्रित टोली बनाएर मैत्रीपूर्ण खेलमा समेत सहभागी हुने कार्यक्रम छ।
नेपाल बेसबल तथा सफ्टबल संघका अध्यक्ष दिपक न्यौपानेले नेपाली टोलीको सम्पूर्ण खर्च वल्र्ड चिल्ड्रेन्स बेसबल फाउन्डेसनले व्यहोरेको बताए। उनका अनुसार सहभागी प्रत्येक नेपाली खेलाडीले करिब १ लाख रुपैयाँ बराबरका खेल सामग्री र पोशाक पनि प्राप्त गर्नेछन्।
