काठमाडौं — आईसीसी क्रिकेट विश्वकप लिग–२ अन्तर्गत नेदरल्यान्ड्समा जारी एकदिवसीय शृङ्खलामा नेपालले लगातार दोस्रो हार व्यहोरेको छ।
बिहीबार राति सम्पन्न खेलमा घरेलु टोली नेदरल्यान्ड्सले नेपाललाई ६ विकेटले पराजित गर्यो। नेपालले दिएको १५८ रनको सामान्य लक्ष्य नेदरल्यान्ड्सले ४४.१ ओभरमा ४ विकेट गुमाएर सहजै पूरा गर्यो।
घरेलु टोलीको जितमा कप्तान स्कट एडवार्ड्सले अविजित ६१ रनको उत्कृष्ट इनिङ्स खेले। नोआ क्रोस ३४ रनमा नटआउट रहे भने सेड्रिक डे लाङ र जाच लायन कासेटले समान २१–२१ रनको योगदान दिए।
नेपालका लागि सोमपाल कामी, ललित राजवंशी र दीपेन्द्रसिंह ऐरीले समान एक–एक विकेट लिए। नेदरल्यान्ड्सको एक विकेट रनआउटमार्फत आएको थियो।
यसअघि टस हारेर पहिले ब्याटिङ गरेको नेपाल ४४.४ ओभरमा १५७ रनमै अलआउट भयो। नेपाल लगातार दोस्रो खेलमा पनि १५७ रनमै समेटिएको हो। यसअघि नामिबियाविरुद्धको खेलमा पनि नेपाल यही स्कोरमा अलआउट भएको थियो।
नेपालका लागि आरिफ शेखले ९० बलमा सर्वाधिक ४१ रन बनाए। गुल्शन झाले २९ रन जोडे भने दीपेन्द्रसिंह ऐरीले २१ रनको योगदान दिए। आसिफ शेखले १४ रन बनाए भने करण केसी १३ रनमा अविजित रहे।
नेदरल्यान्ड्सका बलर रोलफ भान डर मर्वेले ६.४ ओभरमा १५ रन खर्चेर ३ विकेट लिए। एलेक्स रोयले ८ ओभरमा २४ रन दिँदै ३ विकेट हात पारे भने लोगान भान बिकले २ र काइल क्लेइनले १ विकेट लिए।
यस जितसँगै नेदरल्यान्ड्सले २९ खेलबाट ३४ अंक जोड्दै लिग–२ अंकतालिकामा आफ्नो स्थिति थप बलियो बनाएको छ। नेपाल भने ३० खेलबाट २४ अंकसहित पछाडि परेको छ।
नेपालले शृङ्खलाको आफ्नो तेस्रो खेल आगामी सोमबार नामिबियाविरुद्ध खेल्नेछ। त्यसअघि शनिबार नेदरल्यान्ड्स र नामिबियाबीच प्रतिस्पर्धा हुनेछ।
