काठमाडौं । नेपाली काँग्रेसले कोशी प्रदेश सरकारबाट बाहिरिने प्रक्रिया अघि बढाएको छ। सुदूरपश्चिम प्रदेशमा नेकपा (एमाले) सँगको सत्ता सहकार्यमा देखिएको असहजतापछि काँग्रेसले प्रदेश सरकारहरूमा सहभागी आफ्ना मन्त्रीहरू फिर्ता बोलाउने निर्णय गरेसँगै कोशीमा पनि सरकार छाड्ने तयारी गरिएको हो।
काँग्रेसका तर्फबाट कोशी प्रदेश सरकारमा सहभागी चार जना मन्त्रीले आजै राजीनामा दिने तयारी गरेका छन्। यसबारे औपचारिक निर्णय लिन काँग्रेस संसदीय दलको बैठक जारी रहेको बताइएको छ।
हाल कोशी प्रदेश सरकारमा काँग्रेसका मन्त्रीहरूले भौतिक पूर्वाधार, स्वास्थ्य, उद्योग, कृषि तथा सहकारी र पर्यटन, वन तथा वातावरण मन्त्रालयको जिम्मेवारी सम्हालिरहेका छन्।
यसअघि सरकारमा रहने वा नरहने विषयमा काँग्रेसभित्र संस्थापन र इतर समूहबीच मतभिन्नता देखिएको थियो। तर, पछिल्लो समय एमाले नेता हिक्मतकुमार कार्की नेतृत्वको कोशी प्रदेश सरकारबाट बाहिरिने विषयमा दुवै पक्षबीच सहमति बनेको बताइएको छ।
