काठमाडौँ । आगामी २०औं एशियन गेम्स खेल्ने नेपालका आठ कराते खेलाडीले बंगलादेशमा हुने दशौं दक्षिण एसियाली कराते च्याम्पियनसिपमा प्रतिस्पर्धा गर्ने भएका छन् ।
बंगलादेशको राजधानी ढाकामा जुलाई १५ देखि १९ तारिखसम्म हुने प्रतियोगितामा नेपालबाट विभिन्न उमेर समूहका ८० खेलाडी सहभागी हुनेछन् । तीमध्ये राष्ट्रिय टोलीका आठ खेलाडी आगामी एशियन गेम्स खेल्ने टोलीका सदस्य हुन् ।
एशियन गेम्सको फाइटतर्फ महिला ६८ केजीमुनि एरिका गुरुङ, महिला ६१ केजीमुनि निरुपा दोङ तामाङ, पुरुष ५७ केजीमुनि राकेश मानन्धर, पुरुष ६० केजीमुनि मीनबहादुर तामाङ र पुरुष ८० केजीमाथि तेन्जिङ शेर्पाले प्रतिस्पर्धा गर्नेछन् । प्रशिक्षक कुशल श्रेष्ठका अनुसार उनीहरूले ढाकामा पनि यही तौल समूहमा खेल्नेछन् ।
कातातर्फ सानुमाया थिङले एकल र टिम कातामा प्रतिस्पर्धा गर्ने प्रशिक्षक मण्डेकाजी श्रेष्ठले बताए । टिम कातामा एलिशा रास्कोटी मगर र मेघा लिम्बू पनि छन् । एशियन गेम्समा पनि यही तीन खेलाडीले कातातर्फ नेपालको प्रतिनिधित्व गर्ने तय भएको छ ।
दशौं दक्षिण एसियाली कराते च्याम्पियनसिपमा नेपालबाट यु–१०, यु–१२ र यु–१४ उमेर समूहमा २५ खेलाडीले प्रतिस्पर्धा गर्नेछन् । नेपाल सातौं र आठौं संस्करणको च्याम्पियन हो भने पछिल्लो संस्करणमा उपविजेता बनेको थियो । प्रतियोगिताका लागि नेपाली टोली बुधबार ढाका प्रस्थान गरिसकेको छ ।
राष्ट्रिय खेलकुद परिषद् (राखेप) परिसरमा आयोजित कार्यक्रममा राखेपका उपाध्यक्ष विशाल श्रेष्ठ र सदस्यसचिव रामचरित्र मेहताले टोलीलाई सफलताको शुभकामना दिँदै बिदाइ गरे । कार्यक्रममा नेपाल कराते महासंघका अध्यक्ष तथा राखेपका पूर्व सदस्यसचिव युवराज लामा, नेपाल सितोरियो कराते डो संघका अध्यक्ष दावा गुरुङलगायत करातेका पदाधिकारीको उपस्थिति थियो ।
टोलीमा महासंघका अध्यक्ष युवराज लामा, नेपाल ओलम्पिक कमिटीका उपाध्यक्ष दावा गुरुङ, टोली प्रमुख महेन्द्र सिंह, टोली व्यवस्थापक प्रेमलाल बोम्जनसहित प्रशिक्षक, अफिसियल र विभिन्न उमेर समूहका ८० खेलाडी सहभागी छन् । नेपालले प्रतियोगितामा काता र कुमिते दुवै विधामा प्रतिस्पर्धा गर्दै पदक संख्या बढाउने लक्ष्य राखेको छ ।
