काठमाडौँ । अन्तर्राष्ट्रिय क्रिकेट परिषद् (आइसिसी) ले सार्वजनिक गरेको पछिल्लो टी-२० अन्तर्राष्ट्रिय वरियता सूचीमा नेपालले सुधार गर्दै १५औँ स्थानमा उक्लिएको छ। यसअघि १६औँ स्थानमा रहेको नेपालले एक स्थान माथि उक्लिँदै स्कटल्यान्डलाई पछि पारेको हो।
नयाँ वरियता अनुसार स्कटल्यान्ड १६औँ स्थानमा झरेको छ भने नेपाल अब एसोसिएट राष्ट्रमध्ये अमेरिका र नेदरल्यान्ड्सपछि तेस्रो स्थानमा रहेको छ।
वरियताको शीर्ष स्थानमा भारत कायम रहेको छ। सूचीअनुसार १२औँ स्थानसम्म टेस्ट मान्यता प्राप्त राष्ट्रहरूको वर्चस्व रहेको देखिएको छ।
अन्य एसोसिएट राष्ट्रहरूको सूचीमा नामिबिया १७औँ, संयुक्त अरब इमिरेट्स (युएई) १८औँ, ओमान १९औँ र क्यानडा २०औँ स्थानमा रहेका छन्।
पछिल्लो समय नेपाली टोलीले टी-२० ढाँचामा उल्लेखनीय प्रदर्शन गर्दै आएको छ। हालै सम्पन्न एसियन गेम्स क्वालिफायरमा नेपाल विजेता बनेको थियो।
साथै, पछिल्ला सात टी-२० खेलमध्ये छ खेलमा जित हासिल गर्दै टोलीको प्रदर्शन लगातार सुधारिएको देखिएको छ।
