काठमाडौं। आईसीसी विश्वकप लिग २ मा लगातार दुई फराकिलो जित दर्ता गर्दै नेपाल अंक तािलकाको पाँचौं स्थानमा उक्लिएको छ ।
घरेलु मैदानमा जारी त्रिकोणात्मक श्रृंखलामा अमेरिका र स्कटल्यान्डलाई नेपालले पराजित गरेको हो ।
आज भएको खेलमा नेपालले स्कटल्याण्डलाई ६ विकेटले हरायो । यसअघि अमेरिकालाई ९ विकेटले पराजित गरेको थियो । दुई फराकिलो जितले नेपालको नेट रनरेटमा पनि सुधार आएको छ ।
अहिलेसम्म २७ म्याच खेलेको नेपालले १० जितसहित २२ अंक जोडेको छ । समान २८ म्याच खेल्दै समान २२ अंक जोडेको नामिबियालाई नेपालले नेट रनरेटका आधारमा पछि पारेको हो ।
यसअघि कमजोर प्रदर्शन गर्दै सातौ स्थानमा रहेको नेपालले पछिल्ला ५ खेलमा ४ जित निल्न सफल भयो । घरेलु मैदानमा भएका खेलहरुमा यूएईमाथि ३७ रनको जित निकालेको नेपाल दोस्रो खेलमा भने ओमानसँग १०२ रनले पराजित हुन पुगेको थियो । त्यसपछि यूएईलाई ६ रनले हराउँदा ओमानलाई पनि ८१ रनले मात दियो ।
जारी श्रृंखलाको पहिलो म्याचमा स्कटल्याण्डसँग २ रनले पराजित भएको नेपालले अमेरिकालाई ९ विकेटले हरायो भने आजको खेलमा ६ विकेटले विजयी भयो । यससँगै नेपाल एकैपटक दुई खुड्किलो माथि उक्लिएको हो ।
३१ खेलबाट १६ खेलमा जित र ९ हार व्यहोर्दै ३८ अंकका साथ स्कटल्याण्ड अंकतालिकाको शीर्षस्थानमा छ । दोस्रो स्थानमा रहेको अमेरिकाले २६ खेलमा १८ जित र ८ हारसहित ३६ अंक जोडेको छ ।
तेस्रो स्थानमा रहेको ओमानको २८ खेलबाट १४ जित र ११ हारको नतिजासहित ३१ अंक छ । चौंथो स्थानमा रहेको नेदरल्याण्ड्सले २४ खेलमा १३ जित र ९ हारसहित २८ अंक जोडेको छ ।
पाँचौं स्थानमा उक्लिएको नेपालले २७ खेल खेल्दा १० जित र १५ हारसहित २२ अंक जोडेको छ । समान अंक रहेपनि रनरेटका आधारमा नेपाल छैटौं स्थानको नामिबियाभन्दा माथि पुगेको हो ।
नामिबियाले २८ खेलमा १० जित र १६ हार ब्यहोरेको छ । यस्तै, क्यानडा २४ खेलमा ९ जित र १२ हारको नतिजासहित २१ अंकका साथ सातौं स्थानमा रहेको छ । पुछारमा रहेको यूएईले २४ खेलमा ७ जित निकाल्दा १७ हार ब्यहोरेको छ। उसको १४ अंक छ ।
नेपालको यात्रा अझै चुनौतिपूर्ण
लिग–२ मा नेपाल अझै पनि सेफ जोनमा पुगेको छैन । लिगको ढाँचा अनुसार शीर्ष ६ भित्र अटाउने टिमले एकदिवसीय मान्यता जोगाउने छन् भने शीर्ष ४ ले २०२७ मा हुने विश्वकप क्वालिफायरमा सिधै स्थान बनाउने छन् ।
तल्लो ४ मा रहेका टोलीले भने च्यालेन्ज लिगका टप टोलीहरूसँग क्वालिफायर प्ले–अफ खेल्नुपर्छ । प्ले–अफबाट शीर्ष ४ टोली क्वालिफायरमा प्रवेश गर्छन् ।
क्वालिफायर (१० टोली)बाट शीर्ष ४ ले २०२७ क्रिकेट विश्वकप (दक्षिण अफ्रिका, जिम्बाब्वे र नामिबिया) मा स्थान बनाउँछन् । नेपालले अब शीर्ष ४ भित्र अटाउन बाँकी म्याचहरुमा उत्कृष्ट प्रदर्शनसहित अधिकांश जित निकाल्नुपर्ने हुन्छ ।
नेपालले अब ९ वटा मात्र म्याच खेल्न बाँकी छ । आफूले राम्रो खेलेर मात्र पनि हुँदैन, अन्य टिमहरुको नतिजामा पनि भर पर्नुपर्ने हुन्छ ।
