मुम्बई इन्डियन्सका युवा ब्याटर तिलक बर्माले विष्फोटक इनिङ्स खेलेपछि इन्डियन प्रिमियर लिग (आईपीएल) २०२६ मा बिहीबार पन्जाब किंग्स ६ विकेटले पराजित भएको छ । लगातार पाँचौँ हारसँगै पन्जाबको प्लेअफ पुग्ने सम्भावना कमजोर बनेको छ ।
धर्मशालामा पन्जाबले दिएको २०१ रनको लक्ष्य मुम्बईले १९.५ ओभरमा ४ विकेट गुमाएर पूरा गर्यो । मुम्बईको जितमा नायक बनेका तिलक बर्माले मात्र ३३ बलमा ७५ रनको नटआउट पारि खेले । उनले आफ्नो इनिङ्समा ६ चौका र ६ छक्का प्रहार गरे । त्यस्तै, ओपनर रायन रिकेल्टनले २३ बलमा ४८ रनको योगदान दिए ।
यसअघि टस हारेर पहिले ब्याटिङ गरेको पन्जाबले निर्धारित २० ओभरमा ८ विकेट गुमाउँदै २०० रन बनाएको थियो । उसका लागि प्रभसिमरन सिंहले ५७ रन बनाए पनि टोलीलाई हारबाट जोगाउन सकेनन् । मुम्बईका सार्दुल ठाकुरले घातक बलिङ गर्दै ४ विकेट लिए ।
प्रतियोगिताबाट अघिल्लो खेलमै बाहिरिसकेको मुम्बईको यो जितपछि ८ अंक भएको छ । सुरुवाती सात खेलमा अपराजित रहेको पन्जाब भने १३ अंकसहित तालिकाको चौथो स्थानमा छ ।
