काठमाडौँ । त्रिभुवन विश्वविद्यालय (त्रिवि) क्रिकेट मैदानको नेपाल क्रिकेट संघ (क्यान) सँगको भाडा सम्झौता नवीकरण प्रक्रिया छिट्टै अघि बढ्ने सरकारले जनाएको छ।
प्रधानमन्त्री तथा मन्त्रिपरिषद्को निर्णयबारे जानकारी गराउने क्रममा सञ्चारकर्मीको जिज्ञासामा प्रतिक्रिया दिँदै शिक्षा, विज्ञान तथा प्रविधि मन्त्री सस्मित पोखरेलले त्रिवि नेतृत्वसँग भएको छलफल सकारात्मक रहेको र सम्झौता नवीकरणको प्रक्रिया अघि बढ्ने बताएका हुन्।
उनका अनुसार आज बिहान त्रिविका उपकुलपतिसहित उच्च पदाधिकारीसँग भएको छलफलपछि मैदान खाली गराउने नभई लिज सम्झौता पुनः नवीकरण गर्ने विषयमा सहमति भएको छ। राज्यले ठुलो लगानी गरेको संरचना भएकाले व्यवस्थापन सम्झौतामार्फत निरन्तरता दिनुपर्ने आवश्यकता रहेको उनले उल्लेख गरेका छन्।
सरकारले सार्वजनिक सम्पत्तिको संरक्षण तथा अतिक्रमित जग्गा फिर्ता अभियानलाई अघि बढाउने क्रममा त्रिविले गत वैशाख ४ गते सार्वजनिक सूचना जारी गर्दै सम्बन्धित निकायलाई आवश्यक प्रक्रिया अघि बढाउन निर्देशन दिएको थियो।
त्यसअनुसार त्रिविको रजिस्ट्रार कार्यालयअन्तर्गत सामान्य प्रशासन महाशाखाले नेपाल क्रिकेट संघलाई समेत औपचारिक पत्राचार गरेको छ। हाल त्रिवि र क्यानबीचको विद्यमान सम्झौता यही वैशाख मसान्तमा समाप्त हुने तय भएको छ।
