लहान, २४ भाद्र । सिरहाको कर्जन्हा नगरपालिका-११ स्कुल टोलमा बेवारिसे अवस्थामा २९० किलो गाँजा भेटिएको छ ।
आइतबार दिउँसो प्रहरी चौकी कर्जन्हा र इलाका प्रहरी कार्यालय मिर्चैयाबाट खटिएको टोलीले बारीमा बेवारिसे अवस्थामा राखिएको २९० किलो गाँजा बरामद गरेको हो ।
लागुऔषध गाँजा लुकाई छिपाई राखेको छ भन्ने गोप्य सूचनाको आधारमा खोजतलासमा गएको प्रहरीले उक्त परिमाणको गाँजा बरामद गरेको जिल्ला प्रहरी कार्यालय सिरहाका प्रवक्ता प्रहरी नायव उपरीक्षक मुक्तिनाथ सापकोटाले बताए ।
प्लास्टिकको १९ वटा पोकामा गाँजा भेटिएसँगै एक व्यक्तिलाई शङ्का लागेर प्रहरीले नियन्त्रणमा लिएको छ ।
कर्जन्हा-११ बस्ने अन्दाजी वर्ष ३७ को प्रदिप मुखियालाई शङ्का लागी अनुसन्धानको लागी नियन्त्रणमा लिई इलाका प्रहरी कार्यालय मिर्चैया सिरहाबाट थप अनुसन्धान कार्य भइरहेको डिएसपी सापकोटाले बताए ।
