काठमाडौं । खाद्य व्यवस्था तथा व्यापार कम्पनी लिमिटेडले थापाथलीस्थित बागमती प्रादेशिक कार्यालयबाट खसी बोका र च्याङ्ग्राको आज बिहान देखी बिक्री वितरण सुरु गरेको छ।
जिउँदो खसी र बोकाको मूल्य प्रति केजी ६८० र च्याङ्ग्राको मूल्य प्रतिकेजी १२६० मा कम्पनीले बिक्री वितरण सुरु गरेको हो । असोज २९ गते बसेको कम्पनीको सञ्चालक समितिको बैठकले जिउँदो खसी, बोका र च्याङ्ग्राको मूल्य निर्धारण गरेको थियो।
उल्लेखित मूल्यमा १० रुपैयाँ छुट दिने निर्णय भएको कम्पनीले जनाएको छ। यो वर्षको दसैँमा कम्तीमा दुई हजार खसी बोका र एक हजार च्याङ्ग्रा बिक्री गर्ने कम्पनीले जनाएको छ।
आज बिहानै देखि कम्पनीको थापाथली स्थित बिक्री केन्द्रमा खसी, बोका र च्याङ्ग्रा किन्न ग्राहकको भिड लागेको छ।
यता पशु सेवा विभागले खसी बोका र च्याङ्ग्रालगायतको पशुको स्वास्थ्य परीक्षण र प्रमाणीकरणका लागि काठमाडौँ उपत्यकाका विभिन्न ११ स्थानमा पशु चिकित्सकसहितको टोली परिचालन गरेको जनाएको छ । टोलीले नमुना सङ्कलनपछि स्वास्थ्य देखिएमा हरियो रङ र रोगी देखिए रातो सङ्केत गर्ने व्यवस्था मिलाइएको छ।
कलंकी खसी बजार, बल्खु कालीमाटी माछा बजार, चोभार नाका र चाल्नाखेल राँगा बजार, टुकुचा खसीबजार र खाद्यस्थित थापाथलीमा टोली परिचालन गरेको विभागले जनाएको छ। यस्तै लोकन्थली खसी बजार, साल्लाघारी च्याङ्ग्रा बजार, बालाजु बाइपास नाका, लगनखेल, धापाखेल, आकाशे धारा, थानकोट, दहचोक, मूलपानीमा टोली परिचालित छन्।
विभागले स्वास्थ्यकर र फुर्तिलो खसी, बोका, राँगा छनोट गर्न र मासु उत्पादन र बिक्री वितरण गर्दा सरसफाइमा ध्यान दिन पनि आग्रह गरेको छ।
