काठमाडौँ । ह्वाट्सएप र टेलिग्रामबाट ठगी गरेको आरोपमा प्रहरीले चिनियाँ नागरिकसहित १९ जनालाई पक्राउ गरेको छ।
टेलिग्राममार्फत अनलाइन कक्षा सञ्चालन गर्ने नाममा ठगी गरेको आरोपमा उपत्यका अपराध अनुसन्धान कार्यालयले ९ जना चिनियाँ र १० नेपाली गरी १९ जनालाई पक्राउ गरेको हो।
काठमाडौँ उपत्यका अपराध अनुसन्धान कार्यालयको टोलीले उनीहरूलाई राजधानीको विभिन्न स्थानबाट पक्राउ गरेर बुधवार सार्वजनिक गरेको हो ।
राजधानीमा अवैध रूपमा अफिस सञ्चालन गर्दै ह्वाट्सएपमार्फत विभिन्न व्यक्तिसँग कुराकानी गरी उनीहरूले टेलिग्राम मा अपरेसन टिचर नामक च्यानलमार्फत कक्षा सञ्चालन गरेर ठगी गरेको पाइएको प्रहरीले जनाएको छ । उनीहरूलाई बूढानीलकण्ड र चण्डोल क्षेत्रबाट पक्राउ गरिएको हो ।
उनीहरूको साथबाट विभिन्न कम्पनीको १२ थान ल्यापटप, ७७ थान मोबाइल सेट, विभिन्न कम्पनीका ७४ थान सिम, ६ थान राहदानी, दुई वटा डेक्सटप, चार वटा राउटर र नेपाली नगद चार लाख एक हजार ८२० रुपैयाँ बरामद भएको काठमाडौँ उपत्यका अपराध महाशाखाका प्रवक्ता एसपी सोमेन्द्र सिंह राठौरले बताए ।
पक्राउ पर्ने नेपाली नागरिकमा दोलखा शैलुङगेश्वर गाउँपालिका-३ घर भई हाल बुढानीलकण्ठ नगरपालिका-२ चपली बस्ने बर्ष ४६ को बुद्धिराज श्रेष्ठ, नुवाकोट शिवपुरी गाउँपालिका-५ घर भई हाल चपलीमै बस्ने बर्ष २९ को ईन्द्र तामाङ, शिवपुरी गाउँपालिका-६ घर भई चपलीमा बस्ने बर्ष ३६ को राजकुमार लामा, चपलमै घर भएका बर्ष २५ को प्रयास भण्डारी, दोलखा बैतेश्वर गाउँपालिका-२ बर्ष २६ को अर्जुन श्रेष्ठ छन् ।
त्यस्तै गरी रामेछाप उमाकुण्ड गाउँपालिका-४ घर भई हाल बौद्ध जोरपाटी बस्ने बर्ष ३४ की रविना सुनुवार, लमजुङको दुधपोखरी गाउँपालिका-६ घर भई हाल बुढानीलकण्ठ नगरपालिका-२ महादेबखोला बस्ने बर्ष ३४ की सुनिता गुरुङ, मकवानपुर हेटौडा उप महानगरपालिका-८ घर भई हाल ललितपुरको हात्तिवन बस्ने बर्ष २२ की कृष्टिना लामा भन्ने जमुना गोले रहेको एसपी राठौरले बताए ।
पक्राउ पर्ने अन्य नेपाली नागरिकमा उदयपुर गाईघाट नगरपालिका-११ घर भई हाल काठमाडौँको ४ चण्डोल बस्ने बर्ष १९ की अनिता मगर र गोरखा चुमनुब्री गाउँपालिका घर भई हाल चण्डोलमै बस्ने बर्ष २० की अनु गुरुङ रहेका छन् ।
पक्राउ परेका सबैलाई ठगी सम्बन्धि कसुर अन्तर्गत थप अनुसन्धान एवं कारबाहीको लागि जिल्ला प्रहरी परिसर टेकु, काठमाण्डौ पठाईएको आज पत्रकार सम्मेलनमा जानकारी दिइयो ।
