काठमाडौं । महोत्तरीको बर्दिबासदेखि १२ दिनको पैदलयात्रा गरेर काठमाडौं आइपुगेका मिटरब्याज पीडितहरूले काठमाडौंमा प्रदर्शन जारी राखेका छन् ।
आज बिहान प्रधानमन्त्रीको सरकारी निवास बालुवाटारमा धर्ना दिन पुगेका पीडितहरूलाई प्रहरीले टंगालमै रोकेपछि उनीहरू त्यहाँबाट भद्रकाली हुँदै माइतीघर मण्डलामा पुगेका धर्ना दिएका छन् ।
धर्नामा सहभागी हुन पुगेका राष्ट्रिय प्रजातन्त्र पार्टीका सासंद ज्ञानेन्द्र बहादुर शाहीले उनीहरूसँग भेटघाट गर्न खोज्दा राजतन्त्रको पक्षथर हामीलाई चाहिँदैन भन्दै प्रदर्शनकारीले शाहीलाई बहिष्कार गरेका हुन् ।
मिटरब्याज साहुँहरू सामन्तबादी सोच भएको र राजतन्त्र पनि सामन्तबादी सोच भएको कारण राप्रपाको सहयोग नचाहिने भन्दै प्रदर्शनकारीलाई शाहीलाई बहिष्कार गरेको प्रदर्शनमा सहभागी एक व्यक्तिले सञ्चारकर्मीलाई बताए।
माइतीघरमा केहीबेर धर्ना दिएर मिटरब्याज पीडितहरू नयाँ बानेश्वरतर्फ लागेका छन् ।
यसअघि धेरै पटक सरकारबाट आश्वासन पाए पनि मिटरब्याजमाथि कारबाही नभएको र आफूहरूले न्याय नपाएको भन्दै अब भने समस्या समाधान नभएसम्म घर नफर्कने अडानमा उनीहरू रहेका छन् ।
सोमबार काठमाडौँ महानगरपालिकाको नगर प्रहरीले मिटर ब्याज पीडितलाई खुलामञ्च प्रवेश गर्न रोक लगाएको थियो । सो क्रममा उनीहरूको राशन बोक्ने गाडी पनि प्रहरीले नियन्त्रणमा लिएर मध्य राति मात्र फिर्ता दिएको उनीहरूको आरोप छ ।