काठमाडौं । नेपाल प्रहरीका चार जना नायव महानिरीक्षक (डीआईजी)हरु अतिरिक्त महानिरीक्षक (एआईजी)मा बढुवा सिफारिस भएका छन्।
बढुवाका लागि सिफारिस हुने डीआईजीहरुमा सन्दीप भण्डारी, सुदिप गिरी, मिरा चौधरी र टेक बहादुर तामाङ छन्। एआईजीमा बढुवा सिफारिस भएका तामाङबाहेक अन्य तीन जना नेपाल प्रहरी प्रधान कार्यालय विभिन्न शाखामा कार्यरत छन् । तामाङ भने अख्तियार दुरुपयोग अनुसन्धान आयोग प्रहरी महाशाखा टंगाल काठमाडौंमा कार्यरत थिए ।
गृह मन्त्रालयका सचिव नेतृत्वको बढुवा समितिको आज (सोमबार) बसेको बैठकले प्रहरीको जनपद समूहतर्फका ४ जना डीआईजीलाई एआईजीमा बढुवा गर्न सिफारिस गरेको हो।
बढुवा समितिको सिफारिसलाई मन्त्रिपरिषद्को बैठकले अनुमोदन गरे उनीहरुको बढुवा हुनेछ।
चैत १० मा प्रहरी महानिरीक्षक (आइजीपी) धीरजप्रताप सिंह अवकाश हुँदा उनीसँगै तीन एआइजी पनि अनिवार्य अवकाशमा गएका थिए । सिंहकै ब्याची एआइजी सहकुलबहादुर थापा, उत्तमराज सुवेदी र दिवेश लोहनी अवकाशमा गएका हुन् । वसन्तबहादुर कुँवर महानीरीक्षकमा पदोन्नती भएपछि रिक्त भएको चार एआइजीको पदमा डीआइजीहरूलाई बढुवा सिफारिस गरिएको हो ।