क्यालिफोर्निया । अमेरिकास्थित एनआरएनए नन रेसिडेन्ट नेपाली एशोसियन (क्यालिफोर्निया) ले श्रमजीवी–पत्रकार संघ, नेपाल र त्यसका अध्यक्ष जन्मदेव जैसीलाई सम्मान गर्ने भएको छ ।
श्रमजीवीका पक्षमा काम गरेर क्रियाशील भएको ठहरसहित सो संस्थाले “अन्तर्राष्ट्रिय सेवा पुरस्कार–२०२३”द्वारा सम्मान गर्ने निर्णय गरेको अध्यक्ष माधव मरासिनीले जनाएका छन् ।
संस्थाका महासचिव दिपेश लामाका अनुसार श्रमजीवी पत्रकार संघ नेपाललाई नेपालमा श्रमजीवीका पक्षमा दृढतापूर्वक श्रमको उचित सम्मानका लागि न्याय दिलाउन ऐतिहासिक भूमिका खेलेकाले उत्कृष्ट संस्था र नेतृत्वको रूपमा सम्मान गर्न लागिएको हो ।
संस्थाले २० हजार रकम र ताम्र पत्रसहितको सम्मान गर्ने भएको हो ।
श्रमजीवी–पत्रकार संघ स्थापनाको २ वर्षमै करिब २६ वटा सञ्चार गृहका पीडित श्रमजीवी पत्रकारहरूको न्यायका लागि पहल गरेको र श्रमजीवी मैत्री कानुन निर्माणका लागि राज्य पक्षसँग निरन्तर दबाब दिँदै आएको छ ।
साथै श्रमजीवीहरूलाई आत्मनिर्भर बनाउन मिडिया नै आत्मनिर्भर हुनुपर्नेलगायतका मुद्दा उठाउँदै आएको छ ।
श्रमजीवी पत्रकार संघसहित अन्य सञ्चार सम्बद्ध १० वटा संस्थाहरूलाई पनि सम्मान गर्ने महासचिव लामाद्वारा जारी विज्ञप्तिमा जनाइएको छ ।
ती सम्मानित संस्थाहरूमा आदिवासी जनजाति पत्रकार महासंघ, शिक्षा पत्रकार समूह, राष्ट्रिय दलित पत्रकार संघ, क्रियाशील महिला पत्रकार, अपाङ्ग पत्रकार मञ्च, राष्ट्रिय स्वास्थ्य पत्रकार मञ्च, राष्ट्रिय यातायात पत्रकार मञ्चलगायत छन् । सम्मान आगामी वैशाख ७ गते प्रदान गरिने आयोजकले बताएका छन् ।