एजेन्सी । रुसी राष्ट्रपति भ्लादिमिर पुटिनले पश्चिमा देशको प्रतिबन्धका बाबजुद पनि रुसको अर्थतन्त्र बलियो रहेको बताएका छन् ।
अत्यावश्यक वस्तुलगायत रोजगारी र नागरिकको सुरक्षा सुनिश्चित गरेको दाबी उनको छ । पछिल्लो तथ्याङ्कले रूसको जीडीपी सन् २०२२ मा २ दशमलव १ प्रतिशतले घटेको छ । तर, गएको वर्षको सुरुमा पश्चिमी विश्लेषकहरूले २० देखि २५ प्रतिशतको आर्थिक मन्दी बढ्ने बताए पनि त्यसो नभएको पुटिनले बताए ।
चिनियाँ समाचार संस्था सिन्ह्वाका अनुसार उनले सङ्घीय सभालाई आफ्नो वार्षिक सम्बोधनका क्रममा प्रतिबन्धको सुरुआत गर्नेहरूले आफैंलाई समस्यामा पारेको समेत टिप्पणी गरेका थिए । “हामीले आर्थिक अवस्थाको स्थायित्व सुनिश्चित गरेका छौं, नागरिकको सुरक्षा गरेका छौं, रोजगारी बचाएका छौं, ‘ राष्ट्रपति पुटिनले भने, ‘अत्यावश्यक वस्तुलगायत बजारको अभाव हुनबाट जोगाएको छौं, वित्तीय प्रणाली र उद्यमीलाई सहयोग गरेका छौं ।”
उनले मस्कोले अमेरिकी डलर र अन्य पश्चिमी मुद्राहरूबाट स्वतन्त्र, स्थिर एवं सुरक्षित विश्वव्यापी भुक्तानी प्रणाली बनाउन साझेदारहरूसँग काम गरिरहने पनि बताएका छन् ।