काठमाडौँ । नेपाली पत्रकारहरूको अन्तर्राष्ट्रिय सञ्जाल(इन्जा)ले हरेक वर्ष प्रदान गर्दै आएको खोजी पत्रकारिता पुरस्कार यस वर्ष दुई जना पत्रकारलाई प्रदान गर्ने निर्णय गरेको छ ।
सञ्चार क्षेत्रमा लामो समयदेखि कार्यरत पत्रकार मात्रृका दाहाल र तारा वाग्लेलाई पुरस्कार दिने गर्ने निर्णय भएको हो ।
वरिष्ठ पत्रकार तीर्थ कोइरालाको संयोजकत्वमा गठित पुरस्कार छनौट समितिले पत्रकार द्वय दाहाल र वाग्लेलाई प्रदान गर्ने निर्णय गरेको छ ।
पुरस्कृत पत्रकार दाहालले २०६४ सालबाट पत्रकारिता सुरु गरेका थिए ।उनले सुशासन/सार्वजनिक प्रशासन, आन्तरिक तथा राष्ट्रिय सुरक्षा, अपराध, सामाजिक जनचासोलगायत विषयमा कलम चलाउँदै आएका छन् ।
दाहाल दिब्यदर्शन राष्ट्रिय साप्ताहिक, रहस्य राष्ट्रिय साप्ताहिक हुँदै कारोबार दैनिक, नागरिक दैनिक र हाल कान्तिपुर दैनिकमा कार्यरत छन् ।
त्यस्तै पुरस्कृत अर्का पत्रकार वाग्ले विगत १५ वर्ष देखि पत्रकारितामा संलग्न रहँदै आएकी छन् । महिलामाथि हुने विभेद, सार्वजनिक प्रशासन लगायतका विषयमा कलम चलाउँदै आएकी पत्रकार वाग्लेले राजधानी, नेपाल समाचारपत्र, हिमाल खवर पत्रिका हुँदै हाल आइएनएस डट कममा कार्यरत छिन् ।
५० हजार राशिको उक्त पुरस्कार नेपाली पत्रकारहरूको अन्तर्राष्ट्रिय सञ्जाल (इन्जा) को स्थापना दिवस मार्च १ अर्थात् फागुन १७ गते प्रदान गरिने इन्जा ग्लोबलका सचिव दीपक रिजालले बताए ।
