मोरङ । संघीय मामिला तथा सामान्य प्रशासनमन्त्री अमनलाल मोदीले भनसुनको भरमा कर्मचारीको सरुवा नहुने बताएका छन् ।
नेपाल राष्ट्रिय कर्मचारी संगठन प्रदेश नं. १ को दोस्रो सम्मेलनलाई सोमबार विराटनगरमा सम्बोधन गर्दै उनले कर्मचारी सरुवाको बेथिति न्यूनीकरण गर्न नीतिगत व्यवस्था गर्नुपर्नेमा जोड दिए। सरुवाका लागि नेताको ‘पावर’ लगाएर सुगम ठाउँ सर्ने प्रवृत्तिको अन्त्य गर्न केही नीतिगत व्यवस्था गर्ने मन्त्री मोदीको भनाइ थियो ।
उनले हालै बढुवा भएका उपसचिवलाई कसैको कुरा नसुनी स्थानीय तहमा पठाएर भनसुन प्रवृत्ति अन्त्यको प्रक्रिया थालिएको समेत बताए । मन्त्री मोदीले पार्टी निकट कर्मचारीहरुलाई आफ्नै पार्टीको प्रधानमन्त्री, मन्त्री भएपछि सबै चल्छ भन्ने भ्रम भए त्याग्न सचेत समेत गराए। ट्रेड युनियनमार्फत राजनीतिमा सक्रिय कर्मचारीहरुलाई जनताको सेवालाई प्राथमिकता दिन उनले निर्देशन समेत दिए ।
मन्त्री मोदीले भने, ‘जनताको सेवाभन्दा बढी राजनीतिमा क्रियाशील भएको पाइए निर्ममतापूर्वक कानूनी कारबाही प्रक्रिया अघि बढाउँछौं ।’ प्रधानमन्त्रीले मुलुकमा सुशासन कायम गर्नुलाई प्रमुख प्राथमिकतामा राखेको उल्लेख गर्दै उनले सरकारको प्राथमिकताअनुसार सेवा प्रवाहसहित सुशासन कायम गर्नगरी अघि बढ्न निर्देशन दिए ।
