काठमाडौं । नेपाली पत्रकारहरूको अन्तर्राष्ट्रिय सञ्जाल (इन्जा)ले यस वर्ष देखि सुरु गरेको इन्जा फोटो पत्रकारिता पुरस्कार लामो समयदेखि कार्यरत दुई जना फोटो पत्रकारलाई प्रदान गर्ने निर्णय गरेको छ ।
फोटो पत्रकारिताको माध्यमद्वारा नेपाली समाज तथा आम नागरिकलाई सुसूचित गराउँदै आएका वरिष्ठ फोटो पत्रकार नरेन्द्र श्रेष्ठ र सुरेशकुमार श्रेष्ठ (सुरज श्रेष्ठ)लाई प्रदान गर्ने निर्णय गरेको इन्जा ग्लोबलका अध्यक्ष गुणराज लुइँटेलले जानकारी दिए ।
बि.स. २०५२ सालदेखि नेपाल समाचारपत्रबाट फोटो पत्रकारिता सुरु गरेका नरेन्द्र श्रेष्ठले कान्तिपुर पव्लिकेसन, लस एन्जलस टाइम्स, न्यूर्योक टाइम्स, टाइम्स म्यागेजिन, गार्डियन डेली, टेलिग्राफ युके, इन्डिपेन्डेन्ट युके, फाइनान्सियल टाइम्स, वालस्ट्रीट जर्नल, द टाइम्स लण्डन, डाइ वेल्ट,नेशनल ज्योग्राफी, वासिङ्टन पोस्ट लगायतका सञ्चार माध्यममा काम गरिसकेका छन् ।
त्यसै गरी पुरस्कृत हुने अर्का फोटो पत्रकार सुरेशकुमार श्रेष्ठ(सुरज श्रेष्ठ) ले पोखरालाई आफ्नो कार्यक्षेत्र बनाएर फोटो पत्रकारितालाई निरन्तरता दिँदै आएका छन्।
२०६२ सालबाट फोटो पत्रकारितामा संलग्न रहेका श्रेष्ठ विभिन्न सामाजिक संघ संस्थामा समेत आबद्ध रहेर सामाजिक क्षेत्रमा समेत आफ्नो पहिचान बनाउन सफल भएका छन्।
५०-५० हजार राशिको उक्त पुरस्कार नेपाली पत्रकारहरूको अन्तर्राष्ट्रिय सञ्जाल (इन्जा) को स्थापना दिवस मार्च १ अर्थात् फागुन १७ गते प्रदान गरिने इन्जा ग्लोबलका सचिव दीपक रिजालले बताए ।