काँकडभिट्टा । झापामा लागु औषध कारोबार गर्ने व्यक्तिहरूले नयाँ तरिका अपनाएर लागु औषधको ओसारपसार गरेको रहस्य खुलेको छ ।
पूर्वी नेपालको भारतीय सीमा क्षेत्र मेची पुलबाट प्रहरीले अण्डाको क्यारेटमा लागु औषध ल्याउँदै गरेको अवस्थामा दुई जनालाई नियन्त्रणमा लिएसँगै यस्तो रहस्य खुलासा भएको हो ।
सीमावर्ती भारतीय बजार पानीटंकीबाट नेपालतर्फ आउने क्रममा शङ्का लागेर चेक गर्दा उनीहरूले ल्याएको १२ वटा अण्डा भएको क्यारेटमा खानतलासी गर्दा खैरो हिरोइन फेला परेको हो ।
प्रहरीका अनुसार जाँचका क्रममा क्यारेटभित्र राखिएको एउटा अण्डको खोलभित्र प्लास्टिकमा बेरेर लागु औषध लुकाइछिपाई भित्र्याएको पाइएको हो ।
ओसारपसारमा संलग्न ¬अर्जुनधारा नगरपालिका-३ बस्ने वर्ष २४ को ऐतराज इवा र सोही स्थानका वर्ष २७ को प्रकाश खातीलाई इलाका प्रहरी कार्यालय काँकडभिट्टा र लागु औषध नियन्त्रण ब्युरो काँकडभिट्टाबाट खटिएको संयुक्त प्रहरी टोलीले पक्राउ गरेको छ ।
पाँच ग्राम खैरो हिरोइनसहित नियन्त्रणमा लिइएका दुई व्यक्तिउपर थप अनुसन्धान भइरहेको जिल्ला प्रहरी कार्यालय झापाका प्रवक्ता खगेन्द्र प्रसाद रिजालले बताए ।
प्रहरीले लागु औषध ओसारपसारमा संलग्नहरूलाई धमाधम नियन्त्रणमा लिएसँगै कारोबारीहरूले नयाँ शैली अपनाउन थालेका हुन् । डिएसपी रिजालका अनुसार लागुऔषध ओसारपसारमा यो नयाँ तरिका हो ।