नेकपा माओवादी केन्द्रका अध्यक्ष पुष्पकमल दाहाल प्रचण्ड नेतृत्वको मन्त्रिपरिषद्को पहिलो बैठक सुरु भएको छ ।
सिंहदरबारस्थित प्रधानमन्त्री तथा मन्त्रिपरिषद्को कार्यालयमा बेलुका ७:५० बजे बैठक सुरु भएको हो । आजै गठन भएको मन्त्रिपरिषद्को पहिलो बैठक बसेको हो । प्रचण्डको नेतृत्वमा तीन उपप्रधानमन्त्रीसहित ८ सदस्यीय मन्त्रिपरिषद् गठन भएको छ ।
एमालेलगायतका दलहरूको समर्थनमा प्रधानमन्त्री बनेका प्रचण्डलाई राष्ट्रपति विद्यादेवी भण्डारीले आइतबार प्रधानमन्त्रीमा नियुक्त गरेकी थिइन् भने सोमबार पद तथा गोपनीयताको शपथ दिलाएकी थिइन् ।
तीनवटा दलबाट तीनजना उपप्रधान सहित मन्त्रीको कार्यविभाजन तोकिएको भएतापनि आज शपथ लिएका चार मन्त्रीको भने कार्यभार पछि तोकिने राष्ट्रपति कार्यालयका प्रवक्ता सागर आचार्यले जारी गरेको विज्ञप्तिमा उल्लेख छ ।
एमालेबाट विष्णुप्रसाद पौडेललाई उपप्रधानसहित अर्थ मन्त्रालयको जिम्मेबारी तोकिदा, नेकपा (माओवादी केन्द्र) का नारायणकाजी श्रेष्ठलाई उपप्रधानसहित भौतिक पूर्वाधार तथा यातायात मन्त्रालयको जिम्मेबारी तोकिएको छ भने राष्ट्रिय स्वतन्त्र पार्टीका सभापति रबि लामिछानेलाई उपप्रधानसहित गृह मन्त्रालयको जिम्मेबारी तोकिएको छ ।
एमालेबाट मन्त्री बनेका ज्वाला कुमारी साह, दामोदर भण्डारी, राजेन्द्र कुमार राई र जनमत पार्टीबाट मन्त्री बनेका अब्दुल खानको कार्य पछि तोकिने विज्ञप्तिमा उल्लेख छ ।
प्रचण्डले उद्योग, वाणिज्य तथा आपूर्ति; ऊर्जा, जलस्रोत तथा सिँचाई; कानुन, न्याय तथा संसदीय मामिला; कृषि तथा पशुपंक्षी विकास; खानेपानी; परराष्ट्र भूमि व्यवस्था, सहकारी तथा गरिबी निवारण; महिला, बालबालिका तथा ज्येष्ठ नागरिक; युवा तथा खेलकुद; रक्षा; वन तथा वातावरण; शिक्षा, विज्ञान तथा प्रविधि; श्रम, रोजगार तथा सामाजिक सुरक्षा; संस्कृति, पर्यटन तथा नागरिक उड्डयन; सङ्घीय मामिला तथा सामान्य प्रशासन; सञ्चार तथा सूचना प्रविधि; सहरी विकास र स्वास्थ्य तथा जनसङ्ख्या मन्त्रालय आफैँसँग राखेका छन् ।