नवनियुक्त गृहमन्त्री रबि लामिछानेले आफ्नो कार्यभार सम्हाल्दै आफ्नो नागरिक र पासपोर्टको विषयमा निश्पक्ष चाँज गर्न सहयोग गर्ने बताएका छन् ।
शीतलनिवासमा पद तथा गोपनियताको शपथ लिएलगत्तै उनले सिंहदरबारस्थित गृह मन्त्रालय पुगी आफ्नो कार्यभार सम्हालेसँगै सञ्चारकर्मीहरूसँग कुरा गर्दै आफ्नो विवादमा परेको नागरिकता र पासपोर्टका सम्बन्धमा निष्पक्ष छानविन गर्न सघाउने बताए।
‘कसैसँग विभेद नगरी हरेक कुराको निश्पक्ष छानविन गर्ने कुरामा मेरो सहयोग बाहेक केही हुँदैन,’ उनले भने।
केही वर्ष अमेरिका बसेर नेपाल फर्केपछि उनले आफ्नो अमेरिकी परिचयपत्र अमेरिकी दूतावासलाई बुझाए। नेपालमा नागरिकताको विवाद आएपछि उनले अमेरिकी परिचयपत्र बुझाएका थिए।
अमेरिकी परिचयपत्र बुझाएपछि नेपाली नागरिकताका लागि निवेदन नदिएपछि उनी विवादमा परेका थिए। खारेज भएको नागरिकताकै आधारमा राहदानी र निर्वाचन आयोगमा दल दर्ता लगायतको कार्य गरेपछि उनी विवादमा परेका हुन् ।
लामिछानेले विदेशी नागरिकता लिएर नेपाली नागरिकता नत्यागेको, विदेशी नागरिकता त्यागेपछि पुनः नेपाली नागरिकता नलिएको, पुरानै नागरिकताका आधारमा उम्मेदवारी दिएको, विदेशी पासपोर्ट नत्यागी नेपाली पासपोर्ट लिएको उजुरीका आधारमा छानविन भइरहेको छ ।
