राष्ट्रपति विद्यादेवी भण्डारी आफ्ना दुई छोरीहरूसँग भोजपुरमा रहेको आफ्नो जन्मघर पुगेकी छन् ।
भोजपुरको रामप्रसादराई गाउँपालिका-५ मानेभन्जयाङ्ग, आमबोटेमा नवनिर्मित ‘श्रीराम मिथिला बहुप्राविधिक’ शिक्षालयको उद्घाटन गर्ने क्रममा पुगेकी राष्ट्रपति भण्डारीले आफू जन्मेको जन्मघरको समेत निरीक्षण गरेकी हुन् ।
वि.सं. २०१८ साल असार ५ गते सोही घरमा आमा मिथिला पाण्डे र बुबा स्व.रामबहादुर पाण्डेको जेष्ठ सन्तानको रूपमा राष्ट्रपति विद्यादेवी भण्डारीको जन्म भएको हो । भण्डारीका पाँच भाईबहिनीहरू छन् ।
गाउँको एउटा सामान्य किसान परिवारमा जन्मेर सङ्घर्षका अनेकौं आरोह-अवरोहहरू पार गर्दै राष्ट्रपति जस्तो गरिमामय जिम्मेवारीमा पुग्न सफल उनको जीवन सबैका लागि प्रेरणादायी र उर्जापूर्ण छ ।
वि.सं. २०३९ सालमा उनको विवाह कम्युनिष्ट पार्टीका लोकप्रिय नेता मदन भण्डारीसँग भएको थियो । तर नेता मदन भण्डारीको २०५० साल जेठ ३ गतेको एक रहस्यमय सडक दुर्घटनामा दुःखद निधन भएसँगै उनको दाम्पत्य जीवन एघार बर्षको छोटो समयमै समाप्त भयो ।
पतिको दुःखद अवसानपश्चात् नाबालक नै रहेका छोरीहरू उषाकिरण र निशा कुसुमको लालन-पालनको साथसाथै थप राजनीतिक जिम्मेवारी लिँदै उनी अगाडी बढेकी हुन् ।
