केही दिन अगाडि आफू बस्ने कोठाको पङ्खाको हुकमा झुण्डिएर आत्महत्या गरेकी सदिक्षा चौधरीको निष्पक्ष अनुसन्धान गर्न माग गर्दै आज माइतीघरमा प्रदर्शन गरिएको छ ।
मङ्सिर २१ गते बुधवार सानेपा स्थित आफ्नै कोठाको पङ्खाको हुकमा सलको डोरीले पासो लगाई झुन्डिएको अवस्थामा फेला परेकी सदिक्षा चौधरीको निष्पक्ष अनुसन्धानको माग गर्दै उनकी आमा शारदा चौधरी सहित समकक्षी विद्यार्थीहरूले आज माइतीघरमा प्रदर्शन गरेका हुन् ।
बिश्व निकेतन मावि त्रिपुरेश्वर को कक्षा ११ मा अध्ययनरत छात्रा चौधरीलाई विद्यालयका डिसिप्लेन इन्चार्ज “डिआइ” नवराज लोहनीले अनावश्यक मानसिक तनाव दिई आत्महत्या गर्न बाध्य पारेको मृतककी आमा शारदा चौधरी र साथीहरूको आरोप छ ।
सप्तरीको सुरङगा नगरपालिका वडा नं. ७ बसाङकोटी घर भई हाल ललितपुरको सानेपा बस्ने १६ बर्सिया सदिक्षा चौधरीको शव परिवारजनले उठाएका छैनन् । “डिआइ” लोहनीलाई कारबाही नभए सम्म शव नउठाउने उनीहरूको भनाइ छ । मृतक चौधरीको शव हाल पाटन अस्पतालमा रहेको छ ।
जिल्ला प्रहरी परिसर ललितपुरका प्रवक्ता एसपी सुधिर शाहीले घटनाको विषयमा जाहेरी आएको र अनुसन्धान जारी रहेको जानकारी दिए । केटिएम दैनिकसँग कुरा गर्दै एसपी शाहीले भने, ‘बयानहरू लिने काम भइरहेको छ । अनुसन्धानले आत्महत्या दुरुत्साहन तर्फ इंकित गरेको अवस्थामा सोही अनुसार कारबाही अगाडि बढ्छ ।’
थप तस्बिरहरू
