सुकुम्बासीले आफूहरूलाई बस्नका लागि वैकल्पिक व्यवस्था गर्न सरकारसँग आग्रह गरेका छन् । बागमती नदी किनाराका सुकुम्बासीले आज माइतीघरदेखि नयाँबानेश्वरसम्म पदयात्रा गरी आफूहरूलाई बस्नका लागि वैकल्पिक व्यवस्था गर्न सरकारलाई आग्रह गरेका हुन् ।
काठमाडौको बँशीघाट, थापाथली , शान्ति नगर, शंखमुल, गैर्हीगाँउ लगायतका क्षेत्रमा बसोबास गर्दै आएका उनीहरुले आज माइतीघर देखि नयाँ बानेश्वर सम्म दवाब र्याली निकालेका हुन् ।
एकीकृत बागमती सभ्यता बिकास परियोजना र काठमाडौ महानगरपालिकाले सुचना निकाल्दै मंसिर १२ गते थापाथली स्थित सुकुम्बासी बस्ती खाली गर्न लाग्दा झडप भएको थियो । त्यही समय देखि हालसम्म सुकुम्बासीहरुले सरकारलाई दवाब दिन विभिन्न बिरोधका कार्यक्रम गर्दै आइरहेका छन् ।
कार्यक्रममा सञ्चारकर्मीसँग कुरा गर्दै संयुक्त राष्ट्रिय सुकुम्बासी मोर्चा नेपालका अध्यक्ष कुमार कार्कीले वर्षौँदेखि बसोबास गरिरहेको जमिनमा वैकल्पिक व्यवस्था गर्न माग गरे । “वैकल्पिक व्यवस्था बिना गरिएको उठिबास सह्य हुँदैन, वैकल्पिक बसोबास बिनाको उठिबास नागरिक अधिकारमाथिको हनन हो”, उनले भने ।
कार्कीले सुकुम्बासी विध्वंसकारी नभएको भन्दै देश विकास र निर्माणका शक्ति सुकुम्बासी भएको बताए । उनले सरकारले सुकुम्बासीहरूको वार्ता र सहमतिको ढोका बन्द गरेको भन्दै वार्ताबाट समस्याको समाधान गर्न आग्रह समेत गरे ।
यही मङ्सिर १२ गते अधिकार सम्पन्न बागमती एकीकृत विकास समितिको पहलमा काठमाडौँ महानगरपालिका डोजर लिएर सुकुम्बासी बस्ती भत्काउन पुगेदेखि बस्तीमा असहज परिस्थिति सिर्जना भएको थियो ।
मंसिर १२ को झडपमा परि महानगर प्रहरी प्रमुख राजु पाण्डे सहित ३३ जना नगरप्रहरी घाइते भएका थिए । नगरप्रहरी माथी आक्रमण गर्नेलाई महानगरले किटानी जागेरी दिए संगै सुकुम्बासी नेता नारायण परिश्रमी सहित केहीको नाउँमा पक्राउ पुर्जी समेत जारी भइसकेको छ ।
थप तस्बिरहरू
