प्रतिनिधि सभा र प्रदेश सभा सदस्य निर्वाचनको लागि भर्ना लिएका म्यादी प्रहरीलाई आजदेखि बिदाई गरेको छ । निर्वाचनको लागि ४० दिनको सेवा अवधि सहित भर्ना लिइएका म्यादी प्रहरीको आजदेखि म्याद सकिएसँगै उनीहरूलाई प्रमाणपत्र सहित बिदाई गरिएको हो ।
प्रतिनीधी तथा प्रदेस सभा निर्बाचनको लागी अपुग सुरक्षाकर्मी पूर्ति गर्न सरकारले देशभर एक लाख १५ हजार म्यादी प्रहरीको भर्ना गरेको थियो । जसमा स्थानीय तहको निर्वाचनमा म्यादी प्रहरीमा सहभागी भएकाहरूलाई प्राथमिकतामा राखिएको थियो ।
उनीहरूलाई सरकारले प्रतिदिन ८ सय ६९ रूपैयाँको दरले ४० दिन सम्मका लागि निजको व्यक्तिगत बैंक खातामा रकम जम्मा गरी दिने गरी जम्मा पारिश्रमिक ३४ हजार ७६० रूपैयाँ भुक्तानी गर्नेछ । यस्तै खाद्यान्न बापत प्रति व्यक्ति एकमुष्ट ७ हजार २०० रूपैयाँ पाउने छन् , भने हिमाली जिल्लामा खटिने म्यादी प्रहरीको हकमा जिल्लाको न्यूनतम राशन दररेट अनुसारको रकम पाउनेछन् ।
म्यादी प्रहरीले तोकिएको पोशाक तथा अन्य सामान खरिद गर्ने गरी प्रति व्यक्ति ६ हजार रुपैयाँ एकमुष्ट पाएका थिए । हिमाली जिल्लामा खटिने म्यादी प्रहरीहरूलाई गाढा निलो रंगको कपडाको ज्याकेट खरिद गर्न प्रति व्यक्ति थप १ हजार रुपैयाँ दिइएको थियो ।
आज प्रहरी वृत बौद्ध अन्तर्गत रहेका २३३ जवान म्यादी प्रहरीको, एक कार्यक्रम बिच प्रहरी उपरीक्षक दिनेश राज मैनाली र बौद्ध प्रहरी प्रमुख प्रहरी नायव उपरीक्षक हरिबहादुर बस्नेतले प्रमाणपत्र प्रदान गरि बिदाइ गरेका हुन् ।
थप तस्बिरहरू