वाङ्मय शताब्दी पुरुष सत्यमोहन जोशीको पार्थिव शरीर ललितपुर इमाडोलस्थित किष्ट मेडिकल कलेज तथा शिक्षण अस्पताललाई हस्तान्तरण गरिएको छ ।
शताब्दी पुरुष जोशीले यसअघि नै अध्ययन अनुसन्धानका लागि आफ्नो पार्थिव शरीर किष्ट मेडिकल कलेज तथा शिक्षण अस्पताललाई दान दिने घोषणा गरेसँग उनको पार्थिव शरीर अस्पताललाई हस्तान्तरण गरिएको हो । उपचारका क्रममा केही दिनअघि अस्पतालमा भर्ना भएका शताब्दी पुरुष जोशीको आज बिहान एक सय तीन वर्षको उमेरमा निधन भएको हो ।
जोशीको पार्थिव शरीर श्रद्धान्जलिको लागि बिहान अस्पताल परिसर र त्यसपछि ललितपुर महानगर परिसरमा अन्तिम श्रद्धाञ्जलिको लागि राखिएको थियो ।
प्रधानमन्त्री शेरबहादुर देउवाले वाङ्मय शताब्दी पुरुष सत्यमोहन जोशीप्रति ललितपुर महानगर परिसरमा पुगेर श्रद्धाञ्जलि अर्पण गरेका छन् । पुरातत्वविद् जोशीप्रति श्रद्धाञ्जलि अर्पण गर्न सभामुख अग्निप्रसाद सापकोटा, नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड’, संस्कृति, पर्यटन तथा नागरिक उड्डयमन्त्री जीवनराम श्रेष्ठ, काठमाडौं महानगरपालिका प्रमुख वालेन्द्र साह, कलाकार मदनकृष्ण श्रेष्ठ लगायत व्यक्ति तथा नेतागण र सर्वसाधरण त्यहाँ पुगेका थिए ।
जोशीलाई राज्यकातर्फबाट ‘राष्ट्रिय सम्मान’ प्रदान गरिने गृह मन्त्रालयका प्रवक्ता फणिन्द्रमणि पोखरेलले बताएका छन् । त्यहाँबाट जोशीको शरिर अस्पताललाई हस्तान्तरण ललितपुर महानगर प्रमुख चिरिबाबु महर्जनले जानकारी दिए ।
तस्बिरहरू
