भारतीय सेनाका प्रमुख जनरल मनोज पाण्डेलाई राष्ट्रपति विद्यादेवी भण्डारीले दज्र्यानी चिह्न प्रदान गरेकी छिन् ।
राष्ट्रपति कार्यालयमा आज आयोजित एक कार्यक्रमबीच भण्डारीले नेपाली सेनाको मानार्थ महारथीको दज्र्यानी चिह्न प्रदान गरेकी हुन् । सो समारोहमा पाण्डेलाई खड्ग र स्क्रोल प्रदान गरियो ।
भारत र नेपालबीच एक अर्काका सेना प्रमुखलाई मानार्थ महारथीको दर्जा प्रदान गर्ने प्रचलन विगत सात दशकदेखि रहिआएको छ । सन् १९५० मा भारतीय सेनाका सेनापति जनरल केएम करिअप्पालाई पहिलो पटक नेपाली सेनाको सो मानार्थ दर्जा प्रदान गरिएको थियो ।
गत वर्ष नोभेम्बरमा नेपालका प्रधानसेनापति जनरल प्रभुराम शर्मालाई पनि राष्ट्रपति रामनाथ कोविन्दद्वारा नयाँ दिल्लीमा आयोजित एक समारोहमा भारतीय सेनाको मानार्थ महारथीको दर्जा प्रदान गरिएको थियो ।
सो समारोहपछि जनरल पाण्डेले राष्ट्रपति भण्डारीसँग शिष्टाचार भेट गरे । भेटका क्रममा पाण्डेले सो सम्मानका लागि राष्ट्रपति भण्डारीप्रति आभार प्रकट गरेको बताइएको छ ।
आज बिहान आयोजित एक औपचारिक कार्यक्रममा पाण्डेले सैनिक मञ्च टुँडिखेलस्थित वीर स्मारकमा पुष्पहार समर्पण गरी श्रद्धाञ्जली अर्पण गरेका थिए । त्यसपश्चात नेपाली सेनाको मुख्यालय जङ्गी अड्डामा आयोजित विशेष समारोहमा पाण्डेलाई सम्मान गारत अपर्ण गरिएको थियो । त्यसपछि उनले नेपाली समकक्षी जनरल प्रभुराम शर्मासँग भेटवार्ता गरे । भेटवार्ताको क्रममा दुवै पक्षबीच दुई देशका सेनाबीच लामो समयदेखि रहिआएको सम्बन्धलाई थप सुदृढ बनाउने बारे छलफल भएको नेपाली सेनाले जनाएको छ ।
भारत सरकारको तर्फबाट स्थल सेनाध्यक्ष पाण्डेले नेपाली सेनाको क्षमता अभिवृद्धि गर्न हलुका सवारी साधनसहित विविध तालिम उपकरण उपहारस्वरुप प्रदान गरेका छन् ।
नेपाली सेनाका प्रधानसेनापति महारथी प्रभुराम शर्माको निमन्त्रणामा भारतीय सेनाका प्रमुख जनरल मनोज पाण्डे नेपालको पाँचदिने भ्रमणका लागि हिजो काठमाडौं आइपुगेका हुन् ।