भारतीय स्थल सेनाध्यक्ष जनरल मनोज पांडे आज अपरान्ह ४ बजे काठमाडौं आइपुग्ने भएका छन् ।
प्रधान सेनापति महारथी श्री प्रभुराम शर्माको औपचारिक निमन्त्रणामा भारतीय स्थल सेनाध्यक्ष जनरल मनोज पांडे पाँच सदस्यीय भ्रमणदलका साथ नेपाल आउन लागेका हुन् ।
पाँच दिवसीय भ्रमणका दौरान जनरल पांडेले सैनिक मञ्च टुँडिखेलस्थित विर स्मारकमा श्रद्धाञ्जली अर्पण, जङ्गी अड्डामा सम्मान गारत निरीक्षण, प्रधान सेनापति महारथी श्री प्रभुराम शर्मासँग भेटघाट एवं छलफल, भारतीय सेनाको तर्फबाट नेपाली सेनालाई सहयोग स्वरुप प्रदान हुने विविध सामग्रीहरुको हस्तान्तरण कार्यक्रम लगायत कमाण्ड तथा स्टाफ कलेजका शिक्षार्थीहरुसँग अन्तरक्रिया र मध्य कमाण्ड हे.क्वा.को भ्रमण गर्ने कार्यक्रम रहेको छ ।
भ्रमणको मुख्य अंशको रुपमा रहेको नेपाली सेना र भारतीय सेना बीचको परम्परा अनुसार भारतीय सेनाध्यक्ष जनरल पांडेलाई राष्ट्रपति विद्यादेवी भण्डारीले एक विशेष समारोहका बीच नेपाली सेनाको मानार्थ महारथी दर्जा प्रदान गर्ने कार्यक्रम छ ।
यसअघि २० कात्तिक २०७७ मा पाण्डे अघिका भारतीय सेनाध्यतक्ष मनोज मुकुन्द नरवणेले नेपाली सेनाको मानार्थ महारथीको सम्मान ग्रहण गरेका थिए । पांडे अब नेपाली सेनाको मानार्थ महारथीको सम्मान पाउने १९ औं भारतीय सैन्य अधिकारी बन्नेछन् ।
मंगलबार उनी सगरमाथा आधार शिविरको भ्रमण गर्ने कार्यतालिका छ । भ्रमणपछि उनले प्रधानमन्त्री शेरबहादुर देउवालाई भेट गर्ने कार्यक्रम छ । पांडेले आफ्नो भ्रमणको दौरान प्रधानमन्त्री शेर बहादुर देउवासँग औपचारिक भेटघाट गर्ने कार्यक्रम समेत रहेको छ ।
मंगलबार नै काठमाडौंस्थित पशुपतिनाथ मन्दिरको दर्शन गर्ने कार्यक्रम पनि छ । साँझ लैनचौरस्थित भारतीय दूतावासमा रात्रिभोजको कार्यक्रम छ ।
बुधबार मौसम अनुकूल भए मुस्तिनाथ मन्दिरको पनि दर्शन गर्ने कार्यक्रम छ । त्यही क्रममा नेपलाी सेनाको मध्यकमाण्ड हेडक्वार्टर पोखरा जाने कार्यक्रम पनि छ । सोही दिन वसन्तपुरस्थित हनुमान ढोका जाने कार्यक्रम पनि तोकिएको छ । बिहीबार अपरान्ह उनी स्वदेश फर्किने कार्यक्रम छ ।