बालकमाथि अप्राकृतिक यौन दुर्व्यवहार गरेको आरोपमा गैरसरकारी संस्था महासंघ मोरङको अध्यक्ष राजेन्द्र ढकाल पक्राउ परेका छन् ।
१३ वर्षीय बालकलाई पटक–पटक अप्राकृतिक यौन दुर्व्यवहार गरेको आरोपमा उनलाई बुधबार साँझ पक्राउ गरिएको १ नम्बर प्रदेश प्रहरी कार्यालय बिराटनगरका एसपी नविनराज राईले बताए ।
राईका अनुसार उजुरी परेपछि ढकाललाई अनुसन्धानका लागि नियन्त्रणमा लिइएको हो ।
ढकाल एजुकेशन हेल्पलाइनका अध्यक्ष हुन् । उनीलाई आज म्याद थप गरि अनुसन्धान गर्ने तयारी रहेको प्रहरीले बताएको छ । उनी नेपाली कांग्रेसको स्थानीय नेतासमेत रहेको बताइएको छ ।
कानुनमा के छ ?
मुलुकी अपराध संहिता २०७४ को दफा २२५ मा बालयौन दुरुपयोग गर्न नहुने उल्लेख छ । उक्त दफा को उपदफामा (१) मा कसैले बालयौन दुरुपयोग गर्न वा गराउन हुँदैन भने स्पष्ट लेखिएको छ ।
उपदफा (२) मा बालयौन दुरुपयोग भनेको के हो भनेर यसलाई ब्याख्या गरेको छ । त्यसमा लेखिएको छ, ‘कसैले करणीका आशयले बालबालिकालाई अस्वाभाविक रूपमा एकान्तमा लगेमा, यौन सम्बन्धी निजको अङ्ग छोएमा वा समातेमा, यौन सम्बन्धी आफ्नो अङ्ग निजलाई छुन वा समाउन लगाएमा वा निजसँग अन्य कुनै किसिमको यौनजन्य अस्वाभाविक व्यवहार गरेमा बालयौन दुरुपयोग गरेको मानिनेछ ।’
उपदफा (१) बमोजिमको कसूर गर्ने व्यक्तिलाई तीन वर्षसम्म कैद र तीस हजार रुपैयाँसम्म जरिबाना हुनेछ ।