राष्ट्रिय महिला आयोगकी अध्यक्ष कमला पराजुली माथि केही सञ्चारमाध्यमले नियतवस विभिन्न आरोपहरू लगाएको भन्दै आयोगले असन्तुष्टि जनाएको छ ।
बुधबार आयोगको उपसचिव एवम् प्रवक्त्ता चमिला भट्टराईले निकालेको बिज्ञप्तीमा अध्यक्ष पराजुलीलाई बिभिन्न मिडियाहरूले निरन्तर रुपमा पुर्वाग्रहपुर्ण मनसायले गलत, भ्रमपुर्ण, तथ्यहीन र निराधार समाचार प्रकाशन तथा प्रसारण गरेर राष्ट्रिय तथा अन्तराष्ट्रिय रुपमा छवि धमिल्याउने, आत्मसम्मानमा चोट पुर्याउने, सार्वजनिक जीवनमा आँच पुर्याउने, चरित्रहत्या गर्ने र मानहानी समेत गर्ने दुराशयपुर्ण कार्यप्रति आपत्ति रहेको बताइएको हो ।
एउटा गरिमामय भूमिकामा रहेको अवस्थामा आफ्ना बिरुद्ध गरिएका कुप्रचारहरुको खण्डन नगर्दा आफूप्रति विश्वास र भरोसा गर्ने आम शुभचिन्तकहरुको मनमा समेत दुःख, चिन्ता र आशंका महसुस भएको उल्लेख गर्दै अध्यक्ष पराजुलीले आफूबाट कुनै पनि समय कुनै पनि किसिमको गलत कार्य नभएको र आफूबिरुद्ध लगाइएको लाञ्छना उपर सम्बन्धित नियामक निकायबाट निष्पक्ष छानवीन भई दोषी प्रमाणित भएमा आफू सजायँ भोग्न तयार रहेको बताएको बिज्ञप्तीमा उल्लेख गरिएको छ ।
फौजदारी शैलीले व्यक्ति उपर हमला गर्ने, सञ्चार माध्यमहरु र सामाजिक सञ्जालको दुरुपयोग गरेर भ्रामक, अतिरञ्जित र नकारात्मक समाचार प्रकाशन तथा प्रशारण गर्ने गराउने सञ्चारकर्मी तथा सञ्चार माध्यमहरुका बारेमा प्रेस काउन्सिल नेपालका अध्यक्षलाई ध्यानाकर्षण गराएको समेत बिज्ञप्तीमा उल्लेख गरिएको छ ।