नेपाल साइकल सोसाइटीले ‘कीर्तिपुर साइकल घोषणापत्र २०७९’ सार्वजनिक गरेको छ । नेपाल साइकल सोसाइटी, दिगो विकास इन्स्टिच्युट, पब्लिक डिस्कोर्स फाउन्डेसन, टुर दे लुम्बिनी, रोड सेफ्टी सोसाइटी, प्याङ्क बाइक, लायन्स क्लब अफ काठमाडौँ साइकल सिटीको मुठ्ठी दान तथा श्रमदानबाट आयोजना गरिएको कार्यक्रममा उपस्थित प्राज्ञिक व्यक्तित्व तथा अभियन्ताबाट प्राप्त सुझावका आधारमा घोषणापत्र तयार गरिएको विज्ञप्तिमा उल्लेख गरिएको छ ।
जबसम्म जनदबाब उर्लिन्न र माथिल्ला तहका राजनीतिक शक्तिसम्म जनदबाबले प्रभाव पार्न सक्दैन तबसम्म साइकल तथा पैदलमैत्री सहरी विकासको लक्ष्य प्राप्त हुन सक्दैन । विज्ञप्तिमा भनिएको छ, ‘आजको आर्थिक सङ्कट अत्यधिक मात्रामा अनावश्यक पेट्रोलियम पदार्थको दोहन गर्ने सवारी साधन केन्द्रित सहरी विकासको दुष्परिणाम हो ।’
यस्ता छन् घोषणापत्र २०७९ को प्रतिबद्धता
हामी साइकल तथा पैदलमैत्री संस्कृतिले सुसज्जित समाज निर्माणको स्पष्ट कार्ययोजना विहीन उम्मेदवारलाई भोट दिनेछैनौँ ।
हामी पश्चिमा विकाश शैलीको अन्धानुकरण गर्दै सीमित पुँजीपति पोस्ने विकासको खाँका बोकेर मौलिक सम्पदामैत्री गाउँ शहरमा भोट माग्न आउने उम्मेदवारलाई बहिस्कार गर्नेछौँ ।
हरेक उम्मेदवारसँग साइकल तथा पैदलमैत्री दिगो विकासको सुनिश्चितता गर्ने पालिका विकासको स्पष्ट रणनीति तथा कार्य योजनाको माग गर्ने छौँ ।
यस्ता छन् घोषणापत्र २०७९ को मागहरू
प्रत्येक पालिकामा साइकल तथा पैदलमैत्री संस्कृति निर्माण लक्षित विशेष बोर्डसहित एउटा अलग्गै योजना शाखाको स्थापना गरियोस्
हरेक पालिकामा साइकल, सार्वजनिक यातायात तथा पैदलमैत्री दिगो सहरी विकास रणनीतिक गुरुयोजना निर्माण गरियोस्
अवस्था अनुरूप महिला, बालबालिका, जेष्ठ नागरिक तथा अपाङ्गतामैत्री मौलिक खुला क्षेत्र, साइकल पार्क, साइकल संरचना विकासका आवश्यक कार्यक्रम तर्जुमा गरियोस्
हरेक वर्ष गुरुयोजनाले औँल्याए अनुरूप साइकल तथा पैदलमैत्री कार्यक्रम सञ्चालनका लागि वार्षिक बजेटको व्यवस्था गरियोस्
