एकिकृत समाजवादी समर्थित अनेरास्ववियूले एमसीसीको शव (पुत्ला) दहन गरेको छ । उनीहरूले सांकेतिक शव बनाएर त्यसमा म एमसीसी हुँ लेखेको पम्फलेटहरू राखेका थिए ।
नेपाल कमर्स क्याम्पस मिनभवनबाट शव निकालेर मलामी बनेका अनेरास्ववियूका कार्यकर्ताहरू बागमती नदी किनार हुँदै शान्तिनगर तिनकुनेमा पुगेर शव दहन गरेका हुन्।
प्रदर्शनकारीहरुले सांकेतिक शव जलाउन खोज्दा प्रहरीले आगो निभाएको थियो । मिनभवनमा प्रदर्शनकारी र प्रहरीबीच सामान्य झडप समेत भएको छ ।
उता एभरेष्ट होटलअगाडि योङ कम्युनिस्ट लिग र समाजवादीको युवा संगठनहरूले विरोध प्रदर्शन जारी राखेका छन् । सरकारमा सहभागी माओवादी र समाजवादी सडकमा पनि उत्रिएर दोहोर चरित्र देखाएको भन्दै विरोध पनि हुन थालेको छ ।
पूर्वप्रधानमन्त्री तथा नेकपा समाजवादीका वरिष्ठ नेता झलनाथ खनालले एमसीसीको विषयमा दंगा मच्चिने खालको अभिव्यक्ति दिएका छन् । आज प्रकाशित भएको उनको अन्तर्वार्तामा खनालले भनेका छन् “यदि एमसीसी पेस भएर अघि बढ्यो भने देशभरि आगो बल्छ । आगो मात्र बल्दैन क-कसका टाउको फुट्छन्, क-कसका हातखुट्टा भाँचिन्छन् ? अहिले केही भन्न सकिँदैन । यो राष्ट्रियताको सवाल हो, मान्छेले ज्यान छोड्छ ।”
हेरौं तस्विरहरू