२४ लाख डोज खोप दुरुपयोग भएको विषयमा स्वास्थ्य मन्त्री विरोध खतिवडा सहित संलग्न अन्यलाई कारबाही गर्न माग गर्दै आज अख्तियार दुरुपयोग अनुसन्धान आयोगमा उजुरी दर्ता भएको छ ।
राष्ट्रिय युवा सङ्घ नेपालको अगुवाइमा आज (मंगलबार) जम्बो टोली अख्तियार परिसरमा पुगेर उजुरी दर्ता गराएको हो । सङ्घले स्वास्थ्य मन्त्री विरोध खतिवडाले भ्रष्ट्राचार गरेको समेत आरोप लगाएको छ ।
भ्रष्टाचार संलग्न मन्त्री लगायत अन्य व्यक्ति उपर छानबिन गरी कारबाही गरी पाउँ भन्दै बुझाइएको उजुरी पत्रमा २४ लाख डोज भ्याक्सिन हिनामिना गरेर करिब २ अर्ब ४० करोड राज्य कोषको रकम हिनामिना गरेको आरोप लगाइएको हो ।
“खोप चोरी प्रकरणमा संलग्न विरुद्ध मुद्दा दर्ता कार्यक्रम” लेखेको ब्यानर बोकेर अख्तियार परिसर पुगेको उक्त जम्बो टोलीले केपी शर्मा ओली सरकारले पौषसम्म सबै नागरिकलाई खोप लगाउने लक्ष्य राखेकोमा अहिलेको सरकारले उक्त लक्ष्य पुरा नगरेको समेत बताएको छ ।
राष्ट्रिय युवा सङ्घ नेपालका सह संयोजक संजिब कुमारले भ्रष्टाचार निवारण ऐन २०५९ को दफा ३, ८, १७ तथा अन्य कानुनी प्रावधान बमोजिम संलग्नहरूमाथि कारवाहीको माग गरेको छ ।
यता मन्त्रालयले सोमबार एक सूचना जारी गर्दै माघ २१ भित्रमा खोपको विवरण बुझाइसक्न स्वास्थ्य सेवा विभाग अन्तर्गतको व्यबस्थापन महाशाखा, सातवटै प्रदेश स्वास्थ्य आपूर्ति व्यवस्थापन केन्द्र, जिल्लास्थित ७७ वटै स्वास्थ्य कार्यालय र ७५३ वटै स्थानीय तहहरूलाई निर्देशन दिएको छ ।
ठूलो संख्यामा खोप हराएको भन्दै खोप व्यवस्थापनलाई लिएर सरकारको आलोचना भइरहँदा मन्त्रालयले छानबिनका लागि ५ सदस्यीय समिति बनाएको छ । उक्त ५ सदस्यीय समितिले खोप अभिलेख विवरण अध्यावधिक गर्ने जिम्मेवारी पनि पाएको छ । समितिले २ हप्तामा प्रतिवेदन बुझाउने मन्त्रालयकी प्रवक्ता डा संगीता मिश्राले जानकारी दिइन ।