काठमाडौं उपत्यकाका सडकमा जोर बिजोर प्रणाली लागू भएको छ वा छैन भन्दै कडा रुपमा चेकिङ भइरहेको छ ।
कोरोना सङ्क्रमण तीव्र रुपमा बढ्दै गएकाबेला त्यसको रोकथाम, नियन्त्रण, निदान र उपचारलाई थप प्रभावकारी बनाउने भन्दै काठमाडौं उपत्यका भित्रका तीनवटै प्रमुख जिल्ला अधिकारीहरूले शुक्रबार राति १२ बजेदेखि लागु हुने सवारी साधनहरूमा जोर बिजोर लागू गरेका हुन् ।
शनिबार खासै चेकिङ नगरिएपछि आइतबार भने विभिन्न स्थानमा बसेका ट्राफिक प्रहरीहरूले चेकिङ कडा पारेका छन् ।
बिना परिचयपत्र वा बिना काम गुड्ने त्यस्ता सवारीसाधनलाई नियन्त्रणमा लिएर केही बेर होल्डमा राखी सम्झाइबुझाइ पठाउने गरिएको प्रहरीले बताएको छ । जोरबिजोर प्रणाली लागू गरिएसँगै उपत्यकामा सवारीसाधनको चापमा केही कमी आएको ट्राफिक प्रहरी महाशाखाले जनाएकाे छ ।
जोर गते जोर नम्बर र बिजोर गते बिजोर नम्बरको सवारी सञ्चालनबारे थप स्पष्ट पार्दै प्रशासनले जोर बिजोर लागू नहुने सवारी साधनबारे स्पष्ट जानकारी दिएको छ । औषधि एवं स्वास्थ्य सामग्री बोकेका सवारी साधन, एम्बुलेन्स, दमकल, शववाहन, ग्याँस, पेट्रोलियम पदार्थ, खाद्यान्न, दुग्धजन्य पदार्थ, फलफूल, तरकारी, पानी, अन्डा, माछामासु, पशुपंक्षीका दाना, एवं कृषि तथा पशुजन्य सामग्रीहरु बोक्ने सवारी साधन (चालक र सहचालक मात्र), निर्माण सामग्री बोक्ने सवारी साधन (चालक र सहचालक मात्र) लाई जोर बिजोर लागू हुँदैन ।
त्यस्तैगरी परिचयपत्रको आधारमा सरकारी कर्मचारी, चिकित्सक, स्वास्थ्यकर्मी, सुरक्षाकर्मी र सार्वजनिक संस्थानका कर्मचारीले प्रयोग गर्ने सवारी साधन, परिचयपत्रको आधारमा बैक/बीमा/बित्तीय संस्था/वायुसेवा कम्पनी/डाक तथा कुरीयर सेवा/ दूर सञ्चार सेवा प्रदायक निकायका कर्मचारीले प्रयोग गर्ने सवारी साधनमा पनि जोर बिजोर लागू हुँदैन ।
सूचना तथा प्रशारण विभागवाट जारी प्रेस पास/पत्रकार परिचयपत्र रहेका संचारकर्मीले प्रयोग गरेका सवारी साधन, सरकारी सवारी साधन र कुटनैतिक नियोगका सवारी साधन जोर बिजोर लागू नहुने स्थानीय प्रशासनले जनाएको छ ।
तस्विरहरू