नेकपा एमाले निकट पत्रकारहरूको संगठन प्रेस चौतारी झापा शाखामा मनकुमार गदालको अध्यक्षतामा नयाँ कार्यसमिति गठन भएको छ ।
गौरादह नगरपालिका ५ स्थित महारानीझोडा साना किसान कृषि सहकारी संस्थाको नमुना पाहुना घरमा भएको अधिबेशनले चौतारी झापाको नयाँ नेतृत्व सर्वसम्मत चयन गरेको हो । जिल्ला कमिटिको उपाध्यक्षमा प्रदिप परियार, महिला उपाध्यक्षमा गंगा बराल, सचिवमा प्रकाश पौडेल, सहसचिवमा अच्युत सुवेदी र तिलक योञ्नन र कोषाध्यक्षमा सरोज चौलागाई निर्विरोध चयन भएका हुन् ।
तीनवर्षे कार्यकालका लागि २५ सदस्यीय समिति चयन भएको निर्वाचन समितिका संयोजक गणेश पोखरेलले बताए ।
उपाध्यक्ष परियार इजलास दैनिकका सम्पादक हुन भने सचिव पदमा सर्वसम्मत भएका पौडेल केटिएम दैनिकका उप सम्पादक हुन् । कोषाध्यक्ष चौलागाई पाथिभरा न्यूज डटकमका संचालक/प्रकाशक हुन् ।
सदस्यहरुमा भुमिराज पराजुली, राजु पोखरेल, मिना विश्वकर्मा, कुमार उप्रेती, राजु सन्तोषी थापा, सरोज भट्टराई, जिवन चुँडाल, लक्ष्मीप्रसाद अधिकारी, रुपा बुढाथोकी, रविता राउत, नन्दलाल खतिवडा, ईन्द्र बहादुर राई, खगेन्द्र घिमिरे, अनिल वाग्ले, युवराज आचार्य र पुस्कर गुरागाई छन् ।
सदस्य घिमिरे अनुसन्धान छड्के, आचार्य न्यूज २४ को टेलिभिजन मा आबद्ध छन् । अधिबेशन नेकपा एमालेका उपमहासचिव पृथ्वीसुब्बा गुरुङले उद्घाटन गरेका हुन् । उनले तथ्य र सत्यमा आधारित रहेर मात्र समाचार लेख्न पत्रकारलाई आग्रह गरे । गुरुङले नागरिक हक स्थापना, विकास र समृद्धिका पक्षसमेत कलम चलाउन आग्रह गर्दै मिसन पत्रकारिताभन्दा व्यावसायिक पत्रकारिता गर्न पत्रकारलाई प्रेरित गरेका थिए ।
अधिवेशन उद्घाटनमा एमाले झापाका इन्चार्जसमेत रहेका स्थायी कमिटी सदस्य अग्नि खरेल, एमाले प्रदेश कमिटीका इन्चार्ज देवराज घिमीरे, स्थायी कमिटी सदस्य तथा प्रदेश नं १ का सहइन्चार्ज हिक्मत कार्की, प्रेस चौतारीका केन्द्रीय अध्यक्ष गणेश बस्नेत,पत्रकार महासङ्घ झापाका अध्यक्ष एकराज गिरी, प्रेस चौतारीका प्रदेश कमिटी इन्चार्ज लीलाराज भट्टराई लगायतले शुभकामना मन्तव्य राखेका थिए ।
नयाँ कार्यसमितिमा अधिकांश युवा अनुहारहरू छन् ।
