नेपाल पत्रकार महासंघले श्रमजीवी पत्रकारहरूलाई पारिश्रमिक नदिने सञ्चारमाध्यमहरूमा धर्ना दिने भएको छ ।
आज (सोमबार) नेपाल पत्रकार महासंघमा वरिष्ठ उपाध्यक्ष रमेश विष्टको अध्यक्षतामा बसेको बैठकले विभिन्न बहानामा सञ्चारकर्मीहरूलाई पारिश्रमिक र अन्य सेवा सुविधा नदिने सञ्चार गृहमा कालो ब्यानरसहित धर्ना दिने निर्णय गरेको हो ।
उक्त बैठकले अन्नपूर्ण पोस्ट, नागरिक दैनिक, दि हिमालय टाइम्स, राजधानी दैनिक, रेडियो सगरमाथा, इमेज च्यानल, न्यूज २४ लगायतका सञ्चारमाध्यममा कालो ब्यानरसहित धर्ना दिने निर्णय गरेको नेपाल पत्रकार महासङ्घका महासचिव रोसन पुरीले बताए ।
साथै सञ्चारमाध्यमहरूले प्राप्त गरेको कोभिड सफ्ट लोन (सहुलियतपूर्ण कर्जा) को सही सदुपयोग नभएको ठहर गरेको छ । आज जारी गरिएको विज्ञप्तिमा “राज्यबाट सहुलियतपूर्ण कर्जा लिने तर पत्रकारलाई दिनुपर्ने सेवा सुविधा नदिने कुरा महासंघलाई स्वीकार्य नहुने” बताइएको छ ।
सो बैठकले श्रम समस्या समाधान गर्न अटेर गर्ने सञ्चार प्रतिष्ठानमा महासंघले थप दबाबमूलक कार्यक्रम सञ्चालन गर्ने, कालोसूची तयार गरी सार्वजनिक गर्ने र आवश्यक कानुनी लडाईलाई समेत अवलम्बन गर्ने निर्णय समेत गरेको छ ।
