सञ्चारिका समूहकी अध्यक्ष नितु पण्डितले महिलामाथि हुने गरेको चरित्रहत्याले आफू दुःखी भएको बताएकी छिन् ।
प्रेस काउन्सिल नेपालले आयोजना गरेको “मिडियामा हुने महिला हिंसाको अवस्था र न्यूनीकरणका उपाय” विषयक छलफल कार्यक्रममा बोल्दै उनले विशिष्ट पदमा पुगेका महिलाहरूले गरेको काममा चित्त नबुझे कामको विरोध गर्न आग्रह गरेको छिन् ।
कार्यक्रममा बोल्दै उनले भनिन्, ‘महिला या पुरुषले गरेको कार्यहरू चित्त नबुझे उनीहरूको काम गर्ने शैलीको विरोध गर्ने हो, चरित्र हत्या गर्ने तर्फ लाग्ने हैन’ कुनै पनि महिलालाई अगाडि बढ्न नदिन तेर्साइने प्रश्नहरू नै गलत भएको उनको धारणा छ ।
मिडिया हाउसमा महिलामाथि हुने कुनै पनि हिंसा सहेर नबस्न उनले महिला पत्रकारहरूलाई आग्रह गरेको छिन् । त्यसको लागि सञ्चारिका समूहले पहल गर्ने उनले बताइन् ।
उनले भनिन्, ‘महिला माथि हुने हिसांको बारेमा आएका उजुरीहरूलाई हामीले कानुनी रूपबाट जान र समाधान गर्न प्रेरित गरिरहेका छौँ । र सबैलाई न्याय दिलाउने कोसिस गरिरहेकै छौँ । हामीले जहिले पनि सेफ स्पेस खोजिरहेका हुन्छौँ । हाम्रो कुरा सुनिदिने, त्यसलाई समाधानको बाटो तर्फ लाने र गोपनीयता पनि भङ्ग नहुने गरी सेफ स्पेस बनाउन जरुरी छ ।’
उनले पत्रकारितामा महिला सहभागिता उल्लेखनीय रूपमा बढेको बताउँदै, नयाँ पुस्तालाई आत्मनिर्भर हुन प्रेरित गर्नु पर्नेमा जोड दिइन् । महिलाहरू पत्रकारितामा क्षेत्रमा आउनु हुँदैन भनेर बहस गर्नेहरूले पनि अहिले महिला पत्रकारहरूको भविष्यको बारेमा चिन्तित हुन थालेको बताउँदै उनले अब महिलाहरूलाई अगाडि बढ्न सहज भएको बताइन् ।
