नेकपा एमालेका नेता महेश बस्नेतले विकासको हिसावले लिच्छवि कालपछि केपी शर्मा ओलीको प्रधानमन्त्रीको काल स्वर्ण युग रहेको दावी गरेका छन् । भक्तपुरमा बिहिबार गरिएको कार्यक्रममा बोल्दै उनले ओलीले भक्तपुरको विकासका लागि ४ वर्षमा २० अर्बको बजेट पठाएको भन्दै द्रुत गतिमा काम भइरहेको बताए ।
भूकम्पपछि पुनर्निर्माण सकिएको, सम्पदा क्षेत्रमा सडकमा ढुङ्गा छाप्ने काम भएको लगायतका विकासका फेहरिस्त प्रस्तुत गरे । उनले सभामुख अग्नि सापकोटालाई केपी ओलीले बनाएको सभामुख भन्दै सांसदलाई कारवाही गरेको सूचना छिटो निकाल्न आग्रह गरे । जनता समाजवादीले सरिता गिरीलाई कारवाहीका लागि सूचना निकाल्दा १२ घण्टाभित्र सूचना निकालेको, माओवादीका टोपबहादुर लगायतका सांसदहरुलाई कारवाही गर्दा २४ घण्टामा सूचना निकालेको बताए ।
उनले आज सभामुख सापकोटालाई भेटेर एमालेका १४ सांसदलाई कारवाही गरेको सूचना निकाल्न चेतावनी दिएको बताए । सभामुखले १४ जनालाई कारवाही गर्न आनकानी गरेको उल्लेख गर्दै उनले सभामुखले दलीय व्यवस्था अनुसार गरेको कारवाहीलाई प्रकृयामा नगए सशक्त र प्रतिरोधात्मक गतिविधि अगाडी बढाउने चेतावनी समेत दिए ।
एमाले भक्तपुरका अध्यक्ष बचन देउजाको अध्यक्षतामा आज भएको अध्यक्ष केपी ओलीको विशेष सम्बोधन कार्यक्रममा बोल्दै नेता बस्नेतले प्रधानमन्त्री शेरबहादुर देउवा, माओवादी केन्द्रका अध्यक्ष पुष्पकमल दाहाल प्रचण्डको षड्यन्त्रमा माधवकुमार नेपालको समर्थन मा ल्याएको अध्यादेशले एमालेलाई भन्दा ठूलो क्षती माओवादी र कांग्रेसमा पुग्ने चेतावनी दिए ।