बिपी कोइराला स्वास्थ्य विज्ञान प्रतिष्ठान धरानमा भइरहेको अनियमितता तथा बेथिति सुधारको माग गर्दै काठमाडौँको माइतीघर मण्डलामा प्रदर्शन गरिएको छ।
प्रतिष्ठानमा अध्ययनरत र पास आउट भएका विद्यार्थीहरू, डा गोविन्द केसी अलाइन्स र नागरिक अगुवाहरूले धरानमा भइरहेको आन्दोलनप्रति ऐक्यबद्धता जनाउँदै प्रदर्शन गरेका हुन्। प्रदर्शनमा नागरिक अगुवा तथा पत्रकार नारायण वाग्ले समेत सहभागी भएका थिए ।
उनीहरूले प्रतिष्ठानको सुधारका लागि शुद्धीकरण आवश्यक भएको भन्दै प्रदर्शन गरेका हुन् । प्रतिष्ठान गलत व्यक्तिले नेतृत्व गरेका कारण अनियमितता, भ्रष्टाचार र बेथिति मौलाउँदै गएको प्रदर्शनकारीको बुझाई छ ।
प्रतिष्ठानमा रेक्टर, डिन, उपकुलपति, अस्पतालका निर्देशक पदाधिकारीले तत्काल राजीनामा दिनुपर्ने, प्रतिष्ठानको पदाधिकारी राजनीतिक भागबन्डाका आधारमा भन्दा पनि मेरिटका आधारमा नियुक्ति गरिनुपर्ने लगायतको माग गरिएको छ ।
प्रतिष्ठानको शुद्धीकरणका लागि भन्दै धरानमा आन्दोलनरत विद्यार्थीहरूले बिपी कोइराला स्वास्थ्य विज्ञान प्रतिष्ठान शुद्धीकरण अभियान संयुक्त सङ्घर्ष समिति गठन गरेका छन्। प्रतिष्ठानको विकास र सुधारका लागि असार १ गतेदेखि त्यहाँ आन्दोलन भइरहेको छ।
तस्विरहरू
