पूर्वप्रहरी महानिरीक्षक खड्गजित बरालको शवलाई पशुपति आर्यघाटमा अन्तिम बिदाई गरिएको छ।
९३ वर्षको उमेरमा बरालको मंगलबार बेलुका घरमै निधन भएको हो । बराल २०२९ सालदेखि २०३५ सालसम्म प्रहरी महानिरीक्षक बनेका थिए ।
नवलपरासीमा जन्मे हुर्केका उनी आइजीपी भएपछि काठमाडौँको महाराजगन्जमा बस्दै आएका थिए । उनी तत्कालिन समयमा राष्ट्रिय पञ्चायत सदस्य हुन् । २०४३ सालमा राजाले लूम्बिनी अञ्चलबाट उनलाई राष्ट्रिय पञ्चायत सदस्यमा मनोनित गरेका थिए ।
विसं २०३६ देखि २०४२ सालसम्म तत्कालीन बर्मा अहिलेको म्यानमारका लागि राजदूतको जिम्मेवारी सम्हालेका बराल त्यसपछि राष्ट्रिय पञ्चायत सदस्य बनेका थिए ।
नेपालमा पर्वतारोहण र सीमा सुरक्षाको जग बसाल्न बरालको अग्रणी भूमिका थियो। नेपालीहरू विदेशी पर्वतारोहीका भरियामा मात्र सीमित नभई आफैँ पनि आरोहणमा संलग्न हुनुपर्ने बरालको चाहना थियो। त्यसैले आईजीपी रहँदा बरालकै अग्रसरतामा नेपाल प्रहरी पर्वतारोही प्रतिष्ठान स्थापना भएको थियो।
स्वर्गीय बरालको बुधबार दिउँसो पशुपति आर्यघाटमा अन्त्येष्टि गरिएको छ ।
कोभिडको जोखिम भएकाले उनको हिन्दु परम्पराअनुसार सामान्य ढंगबाट अन्त्येष्टि गरिने भएको छ । नेपाल प्रहरीले पूर्व आइजीपीको सम्मानमा सलामी दिने भएपनि कोभिडका कारण त्यो सम्मान दिन नसकिने प्रहरी प्रवक्ता एसएसपी बसन्त कुँवरले जानकारी दिए ।
