बलिउडका सुपरस्टार अभिनेता आमिर खानविरुद्ध प्रहरीमा उजुरी दर्ता भएको छ। उनले कोरोनाकालमा फिल्मको सुटिगं गर्दा स्वास्थ्य सजगता नअपनाएको भन्दै प्रहरीमा उजुरी परेको हो । भारतमा अहिले कोरोना उच्च बिन्दुमा छ । यस्तो अवस्थामा फिल्मको काम सुरु गरेका अभिनेताले सुरक्षा सजगता नअपनाएको भन्दै उजुरी परेको हो ।
उत्तर प्रदेशको गाजियावादमा फिल्म ‘लालसिंह चड्डा’को सुटिङ गरिरहेका खानविरुद्ध भारतीय जनता पार्टीका विधायक नन्दकिशोर गुर्जरले प्रहरीमा उजुरी दिएका हुन्। विधायकले खानले कोरोना प्रोटोकल पालना नगरेको भन्दै प्रहरीमा उजुरी दिएका हुन्।
अभिनेता खान गाजियावादमा भएको खबरपछि उनका स्थानीय सुभचिन्तक उनीसँग भेट गर्न सुटिङ चलिरहेको स्थानमा पुगेका थिए। आमिरले आफूलाई भेट्न आएका सुभचिन्तकसँग भेटघाट गरे। उनीहरुसँग फोटो खिचाए।
त्यसक्रममा उनले मास्क भने लगाएका थिएनन्। बीजेपी विधायकले आमिरले सुभचिन्तकसँग भेट गर्दा मास्क नलगाएर कोरोना प्रोटोकल पालना नगरेको भन्दै प्रहरीमा उजुरी दिएका हुन।
प्रहरीले अहिलेसम्म आमिरमाथि कुनै कारबाही भने गरेको छैन। अभिनेता खान केही दिनअघि सुटिङका क्रममा घाइते बनेका थिए। तर उनी दुखाइ कम गर्ने औषधि खाएर सुट्रिको कामलाई निरन्तरा दिएका छन्।
यो फिल्ममा आमिरका साथमा अभिनेत्री करिना कपुरले पनि काम गरेकी छन्। यो फिल्म आगामी वर्ष क्रिसमसको अवसरमा रिलिज गर्ने तयारी छ।