नेपालको चर्चित टिभी कार्यक्रम मुन्द्रेको कमेडी क्लबबाट दिपाश्री निरौलालाई हटाईएको छ ।
उनको ठाउँमा चर्चित नायिका करिश्मा मानन्धरलाई ल्याईएको छ । अब प्रसारण हुने एपिसोडमा दिपाश्रीको ठाउँमा दर्शकले करिश्मालाई देख्नेछन् ।
केही समय अघि दिपाश्रीले राजेश हमाल महानायक होईन भनेर दिएको अभिव्यक्तिलाई लिएर विवादमा तानिएकी थिईन् । मुन्द्रेको कमेठी क्लब कार्यक्रमका प्रायोजक कम्पनीको दबाबमा नै दिपाश्रीलाई हटाईएको स्रोतको दाबी छ ।
दिपाश्रीले उक्त कार्यक्रममा अध्यक्षता ग्रहण गर्दै आएकी थिईन् । अबको कार्यक्रममा भने अध्यक्षतामा करिश्मालाई देख्न पाईने भएको छ । मुन्द्रेको कमेडी क्लब चर्चित कलाकार जीतु नेपालको रियालटी कमेडी शो हो । कोरोना कहरका कारण उक्त सो लामो समय स्थगित गरिएको थियो ।
उक्त रियालिटी शोमा राजाराम पौडेल, अर्का हाँस्यकलाकार राजेन्द्र नेपाली र ‘फुलन्देकी आमा’ उमेश राई लगायतका कलाकारहरुको प्रस्तुती देख्न पाइनेछ । जितु नेपाल (मुन्द्रे) ले सोही कार्यक्रमको संचालन गर्ने छन् ।
बिश्व भरका विभिन्न टेलिभिजन च्यानलहरुमा निकै नै रुचाइएको स्केच कमेडी र सेलिब्रिटी टक शोको फर्म्याटलाई पछ्याउदै सम्पूर्ण रुपमा नेपालीपन र मौलिक प्रस्तुति समावेश गरेर ल्याइएको कार्यक्रमले दर्शकको मन जितेको छ ।
