बलिउडका सबै स्टारप्रति उनीहरुको फ्यानको नजर परिरहेको हुन्छ । हरेक कोही आफ्ना मनपर्ने स्टारको बारेमा जान्न उत्सुक हुन्छन् । अर्थात् उनीहरु के खान्छन्, कहाँ घुम्छन् र आफ्नो जीवनशैली कसरी बिताउछन् भन्ने चासो फ्यानमाझ हुन्छ । प्रायः स्टारहरु आफ्नो वास्तविक जीवनलाई मिडियाबाट लुकाउन खोज्छन् । तर केही सेलिब्रेटी यस्ता छन् जसले आफ्नो विवाह पनि गुपचुपमै गरे । उनीहरुका निकट व्यक्तिबाहेक कसैले पनि विवाहको बारेमा थाहा पाएनन् ।
बलिउडको क्यूट कपलका रुपमा क्रिकेटर विराट कोहली र अभिनेत्री अनुष्का शर्मालाई लिइन्छ । यो जोडीले गुपचुप रुपले नै विवाह गरेका थिए । उनीहरुले इटलीको मिलान शहरमा विवाह गरेका थिए । उनीहरु कैयौं वर्षदेखि डेटमा थिए । एक स्याम्पोको विज्ञापनको सुटिङताका उनीहरुको भेट भएको थियो ।
अभिनेत्री विपाशा बसुसँग ब्रेकअप भएपछि अभिनेता जोन अब्राहमले सन् २०१४ को जनवरीमा प्रिया रुंचालसँग गुपचुप विवाह गरे । यो खबरले जोकोही पनि चकित भएका थिए । उनीहरुले अमेरिकामा एक निजी समारोहमा विवाह गरेका थिए ।
अभिनेता मनोज वाजपेयीले ३७ वर्षको उमेरमा अभिनेत्री नेहासँग गुपचुप विवाह गरे । उनीहरुले यति हतारमा विवाह गरे कि विवाह समारोहमा परिवारका सदस्यसमेत सहभागी हुन पाएनन् । दुवैले सन् २००६ मा विवाह गरेका थिए ।
अभिनेता धर्मेन्द्र र अभिनेत्री हेमा मालिनीले एकसाथ कैयौं आइकनिक फिल्म दिएका छन् । जुन फिल्म आजसम्म पनि उत्तिकै रुचाइन्छ । पाँच वर्षसम्म डेट गरेपछि यो जोडीले सन् १९७९ अगष्ट २१ मा गुपचुप विवाह गरे । हेमासँग विवाह गर्नका लागि धर्मेन्द्रले इस्लाम धर्म अपनाउनु परेको थियो ।
अभिनेता सैफ अली खान पनि विवाहको मामलामा छुप रुस्तम नै निस्किए । सैफले आफू भन्दा १२ वर्ष जेठी अमृता सिंहसँग विवाह गरेका थिए । अमृता र सैफले सन् १९९१ मा विवाह गरेका हुन् । विवाहको कुरालाई लामो समयसम्म यो जोडीले लुकाएका थिए । उनीहरुको वैवाहिक सम्बन्ध करिब १३ वर्षसम्म चल्यो ।
अभिनेत्री श्रीदेवीले सन् १९९६ मा निर्माता बोनी कपुरसँग विवाह गरेर सबैलाई आश्चर्यमा पारिन् । दुवैले आफूहरुले विवाह गरेको छनक कसैलाई दिएनन् ।
अभिनेता सञ्जय दत्तले मान्यता दत्तसँग करिब दुई वर्षको डेटिङ पछि ४९ वर्षको उमेरमा विवाह गरेका थिए । सन् २००८ मा दुवैले गुपचुप विवाह गरेका थिए ।
पछिल्लो समयमा यस अनलाइनमा प्रकाशित भएका खोजमुलक समाचारहरु कपि गरेर आफ्नो साइटमा राख्ने पाइएको हुनाले केटीएम दैनिकको अनुमतिबिना कपी नगर्नुहोला । अन्यथा नेपालको प्रतिलिपी अधिकार ऐन र सामाजिक सञ्जाल फेसबुकको Intellectual Property Right अनुसार उजुरी गरिने व्यहोरा सबैको जानकारीको लागि सूचित गरिन्छ ।
