विवेकशील नेपाली दलले काठमाडौं महानगरका मेयर विद्यासुन्दर शाक्य कोरोना संक्रमित हुँदा बसेको होटल खर्चको विवरण माग गरेको छ।
दलकी संघीय समिति सदस्य रञ्जु दर्शना, रजिया बानु र प्रमेश श्रेष्ठले बुधबार महानगरसँग मेयर शाक्य पाँचतारे होटलमा आइसोलेसन बस्दाका खर्चबारे विवरण मागेका हुन्।
उनीहरूले कोरोना रोकथामका लागि महानगरले गरेको खर्चको विवरणसमेत माग गर्दै सूचनाको हकसम्बन्धी निवेदन दर्ता गरेको विवेकशील नेपाली दलले जनाएको छ।
शाक्य आइसोलेसन बस्दा महानगरले खर्च व्यहोरेको भन्दै उनीहरूले उक्त विवरण मागेका हुन्।
कामनपाका मेयर विद्या सुन्दर शाक्यले काठमाडौंको सोल्टी होटलमा आफूसहित परिवारका ३ जनालाई ३ वटा कोठा लिएर दैनिक ७५ हजार भन्दा बढी खर्च गरेको समाचार यसअगाडी नै सार्वजनिक भएको थियो ।
होटल स्रोतका अनुसार झन्डै २० हजार रुपैयाँ शुल्क लाग्ने कोठामा चिकित्सकीय सुविधासहित बसेका शाक्यले प्रतिदिन २५ हजारभन्दा बढी शुल्क तिरे। मेयर शाक्यको परिवारले लिएको तीनवटा कोठा र चिकित्सकीय सुविधासहित दिनको ७५ हजार हाराहारीमा खर्च हुन्छ ।
उनी सोमवार कोरोना मुक्त भएर घर फर्किसकेका छन् । भदौ १५ गते कोरोना पुष्टि भएको मेयर २८ गते घर फर्किए । यस हिसाबले दैनिक ७५ हजारका दरले १३ दिनको झण्डै १० लाख रुपैयाँ हुन्छ ।
र यो पनि पढ्नुहोस् : जनता उपचार नपाएर मर्ने, मेयरलाई सोल्टीको आइसोलेशन ?
यसबारेमा काठमाडौं महानगरपालिकाले सोमबार एक प्रेस विज्ञप्ती जारी मेयर शाक्य नीजि खर्चमा होटलमा सेल्फ आइसोलेसनमा बस्दै आएको जानकारी गराएको हो ।
काठमाडौं महानगरपालिकाका प्रवक्ता राजेश्वर ज्ञवलीले एक विज्ञप्ती जारी गर्दै लेखेका छन् “कामनपाका प्रमुख विद्यासुन्दर शाक्य महानगरकै खर्चमा पाँच तारे होटलमा सुविधासम्पन्न आइसोलेसनमा सेन्टरमा बस्दै आएको भनि विभिन्न सञ्चार माध्यमहरुमा आएको समाचार प्रति गम्भिर ध्यानाकर्षण भएको छ । मेयर शाक्य नीजी खर्चमा होटलमा सेल्फ आइसोलेसनमा बस्दै आउनु भएको व्यहोरा जानकारीको लागि अनुरोध गर्दछु ।”
