बुर्ज खलीफाको उचाई ८ सय २९ मिटर अर्थात इफिल टावरभन्दा तीन गुणा अग्लो छ । मनोरन्जन जगतका केही कलाकारहरु बुर्ज खलीफामा फ्ल्याट किनेर बसिरहेका छन् ।
मलयालम फिल्मको चर्चित अभिनेता मोहनलालको बुर्ज खलीफामा एक फ्ल्याट छ । उनको घर यो भवनको २९ औं तलामा छ । उनले यो फ्ल्याट सन् २०११ मा किनेका थिए । मोहनलालको फिल्म निर्माण र वितरणबाहेक रेष्टुरेन्ट र मसला प्याकिङ व्यापार पनि छ । उनलाई दक्षिण भारतीय अम्बानी भनिन्छ । उनको जीवनशैली कुनै राजामहाराजाको भन्दा कम छैन ।
अभिनेत्री सर्लिन चोपडा यो वर्षको शुरुवातमै बुर्ज खलीफामा आफ्ना लागि फ्ल्याट किनेकी छन् । ‘मेरो जहिल्यै एउटै सपना थियो कि म जुन सहरमा जान्छु, त्यहाँ एउटा अर्पाटमेन्ट होस् । त्यही कारण मलाई मनपर्ने सहरमध्येको एक दुबईमा मैले अर्पाटमेन्ट लिएकी हुँ’, उनले भनेकी छन् ।
शर्लिनले बुर्ज खलीफाबाट आफ्नो एक तस्बिर पनि पोस्ट गरेकी छन् । बुर्ज खलीफाको फ्ल्याटको मूल्यको कुरा गर्दा एक दुई कोठे अर्पाटमेन्ट खरिद गर्दा करिब १५ करोड रुपैयाँ आवश्यक पर्छ । शर्लिनले फिल्ममा कम अभिनय गरे पनि बुर्ज खलीफामा फ्ल्याट किनेकी छन् ।
अभिनेत्री शिल्पा सेठ्ठीलाई सन् २०१० मा उनका पति राज कुन्द्राले विवाहको उपहार स्वरुप २० करोड रुपैंयाँको फ्ल्याट दिएका थिए, जुन फ्ल्याट बुर्ज खलीफामै थियो । तर हाल यो भवनमा शिल्पाको फ्ल्याट छ या छैन भन्ने केही जानकारी आएको छैन ।
बुर्ज खलीफा २७ सय फूटको विश्वकै सबैभन्दा अग्लो भवन हो । यो भवन हेर्न विश्वभरका पर्यटक दुबई पुग्छन् । १ सय ६३ तलाको यो भवन विश्वकै सबैभन्दा धेरै तला भएको भवन पनि हो । भवनको ७६ औं तलामा विश्वकै सबैभन्दा अग्लो स्वीमिङ पूल, १ सय ५८ औं तलामा विश्वकै अग्लो मस्जिद र १ सय ४४ औं तलामा सबैभन्दा अग्लो नाइट क्लब छ ।
